【技藝101】漆線。雕

漆線雕細如髮絲 全靠細膩眼力 巧手

漆線雕，在神像彩繪上，是真特殊的古老技法，因為過程非常厚工，漸漸的台灣已沒有幾位師傅還在做，因為佇台灣，宗教祭祀（tsè-sū）猶原真興，佛像裝thānn仝款有需求佇--咧，漆線雕閣較是工藝ê展現。

逐條都真明，做--起-來，伊看著就真通tháu
Ta̍k-tiâu to tsin bîng, tsò--khí-lâi, i khuànn-tio̍h tō tsin thong-tháu.

每一尊攏是當做家己欲拜ê神明，所以我每一尊攏足用心
Muí-tsi̍t-tsun lóng sī tòng-tsò ka-kī beh pài ê sîn-bîng, sóo-í guá muí-tsi̍t-tsun lóng tsiok iōng-sim.


Kā漆塗捶予軟，挲做幼線，佇漆線雕藝師林家億ê手--裡袂輸開始有性命，相重疊做出lè-táu ê花範（pān），20幾冬ê工夫，台灣像伊這款師傅無幾个
Kā tshat-thôo tuî hōo nńg, so tsò iù-suànn, tī tshat-suànn-tiau gē-su Lîm Ka-ik ê tshiú--lìn bē-su khai-sí ū sìnn-miā, sio-tîng-tha̍h tsò tshut lè-táu ê hue-pān, jī-tsa̍p kuí tang ê kang-hu, Tâi-uân tshiūnn i tsit-khuán sai-hū bô kuí-ê.

註解：
花範：華語『花樣』、『圖案』

漆線雕伊做予伊...tsín做甲...而且伊會當做一寡較立體ê物件。接觸這个線條講：E̋！閣真心適，做--起-來感覺，e̋，這物件哪會當做甲這个程度按呢
Tshat-suànn-tiau i tsò hōo i...tsín tsò kah...jî-tshiánn i ē-tàng tsò tsi̍t-kuá khah li̍p-thé ê mi̍h-kiānn. Tsiap-tshiok tsit-ê suànn-tiâu kóng: E̋! Koh tsin sim-sik, tsò--khí-lâi kám-kak, e̋, tse mi̍h-kiānn ná ē-tàng tsò kah tsit-ê thîng-tōo án-ne.

漆線雕是佇明朝尾期開始興--ê，立體ê ûn、蜷（khûn）ê技法，kā傳統ê佛像點睛開眼，總--是這幼路工課，無牽挽做無路來，逐件作品上無著開3個月，做了閣愛佮對岸競爭
Tshat-suànn-tiau sī tī Bîng-tiâu bué-kî khai-sí hing--ê, li̍p-thé ê ûn, khûn ê ki-huat, kā thuân-thóng ê pu̍t-siōng tiám-tsing khai-gán, tsóng--sī tse iù-lōo khang-khuè, bô khan-bán tsò bô lōo lâi, ta̍k-kiānn tsok-phín siōng-bô tio̍h khai sann kò gue̍h, tsò liáu koh ài kap tuì-huānn kīng-tsing.

註解：
點晴開眼：華語『畫龍點晴』
牽挽：tsia是華語『耐力、撐持』ê意思

In攏削價落去賣這lō物件嘛，對工藝師來講，是講是一个危機啦，但是我感覺嘛是一个轉機啦，物件咧做會那要求那幼路，啊對咱ê工藝方面咱會那來那家己提升
In lóng siah-kè lo̍h-khì bē tsit-lō mi̍h-kiānn--mah, tuì kang-gē-su lâi kóng, sī kóng sī tsi̍t ê guî-ki--lah, tān-sī guá kám-kak mā sī tsi̍t ê tsuán-ki--lah, mi̍h-kiānn teh tsò ē ná iau-kiû ná iù-lōo, ah tuì lán ê kang-gē hong-bīn lán ē ná lâi ná ka-kī thê-sing.

步驟(捶塗，挲線，牽線，塑形)

雲彩佮這lō構圖足重要--ê，啊愛tshân-tshân脆脆，袂按呢垃垃圾圾，花sà-sà，毋知咧做啥mih物件
Hûn-tshái kap tsit-lō kòo-tôo tsiok tiōng-iàu--ê, ah ài tshân-tshân-tshè-tshè, bē án-ne lah-lah-sap-sap, hue-sà-sà, m̄-tsai teh tsò siánn-mih mi̍h-kiānn.

作品

參考逐款技法無仝，一寡柴刻啊，鑿花仔啊，石雕啊，其實攏會當融入漆線雕內底，予漆線雕會當閣較豐沛
Tsham-khó ta̍k-khuán ki-huat bô-kâng, tsi̍t-kuá tshâ-khik--ah, tsha̍k-hue-á--ah, tsio̍h-tiau--ah, kî-si̍t lóng ē-tàng iông-ji̍p tshat-suànn-tiau lāi-té, hōo tshat-suànn-tiau ē-tàng koh-khah phong-phài.

自我要求真懸ê林家億，有閒就四界揣靈感，雖罔忝，伊嘛是講「創作是無底止--ê」，總--是，予伊餒志--ê，是工藝傳承，凡勢來kah盡尾--ah
Tsū-ngóo iau-kiû tsin kuân ê Lîm Ka-ik, ū-îng tō sì-kuè tshuē lîng-kám, sui-bóng thiám, i mā sī kóng “tshòng-tsok sī bô té-tsí--ê”, tsóng--sī, hōo i lué-tsì--ê, sī kang-gē thuân-sîng, huān-sè lâi kah tsīn-bué--ah.

註解：
雖罔：雖然
餒志：華語『灰心、洩氣』

後壁就無人咧學啊，你欲牽師仔就是愛有彼个工作量，大量，啊閣人客願意欲予師仔做，較幼路ê工課，無可能予師仔練習啊，所以講，這拄著...毋是我無愛傳承
Āu-piah tō bô lâng teh o̍h--ah. Lí beh khan sai-á tō sī ài ū hit-ê kang-tsok-liōng, tāi-liōng, ah koh lâng-kheh guān-ì beh hōo sai-á tsò, khah iù-lōo ê khang-khuè, bô-khó-lîng hōo sai-á liān-si̍p--ah, sóo-í kóng, tse tú-tio̍h...m̄-sī guá bô-ài thuân-sîng.

佇台灣，宗教祭祀（tsè-sū）猶原真興，佛像裝thānn仝款有需求佇--咧，漆線雕閣較是工藝ê展現，林家億向望（ǹg-bāng）這塊土地予gâu人有會伸得跤手ê機會
Tī Tâi-uân, tsong-kàu tsè-sū iû-guân tsin hing, pu̍t-siōng tsng-thānn kâng-khuán ū su-kiû tī--leh, tshat-suànn-tiau koh-khah sī kang-gē ê tián-hiān, Lîm Ka-ik ǹg-bāng tsit-tè thóo-tē hōo gâu-lâng ū ē tshun-tit kha-tshiú ê ki-huē.

註解：
會伸得跤手：華語『有用武之地』

阮雖然有這把功夫，但是你無彼个機會去做，你有功夫但是你無所在通發揮，嘛是無效。台灣人，應該是愛予台灣ê師傅一个機會啦
Guán sú-jiân ū tsit-pé kang-hu, tān-sī lí bô hit-ê ki-huē khì tsò, lí ū kang-hu tān-sī lí bô sóo-tsāi thang huat-hui, mā sī bô-hāu. Tâi-uân-lâng ing-kai sī ài hōo Tâi-uân ê sai-hū tsi̍t ê ki-huē--lah.

記者 余榮宗 新北市報導
Kì-tsiá Î Îng-tsong Sin-pak-tshī pò-tō.