老鹽工說時光故事
台鹽佇2002年停產了後，台灣的曬鹽業也隨著劃下句點，後來佇2007年，地方政府及民間業者合作下，乎台南北門的井仔腳鹽田重新曬鹽，成為觀光示範的鹽田，佇遮，擱有老鹽工說著過去曬鹽的故事。
擔鹽上硬啦，有當時仔一晡擔規百擔。
Tann iâm siōng ngē--lah, ū-tang-sî-á tsi̍t-poo tann kui-pah tànn.
洪有志
北門差不多百分之九十全部攏是咱講的坩柿仔鹽埕。
Pak-mn̂g tsha-put-to pah-hun-tsi káu-tsa̍p tsuân-pōo lóng-sī lán kóng ê khann-phuè-á iâm-tiânn.
※台文「坩柿仔鹽埕」，華文就是「瓦盤鹽田」。
涂丁信
水門入來經過大蒸發池，鹹度予伊沖起來，蒸發量予伊起來，濃度予懸到十二度。
Tsuí-mn̂g ji̍p-lâi king-kuè tuā tsing-huat tî, kiâm-tōo hōo i tshìng--khí-lâi, tsing-huat liōng hōo i khí--lâi, lông-tōo hōo kuân kàu tsa̍p-jī tōo.
老鹽工涂丁信，逐工㧣強風，拍開水門，予海水流入蒸發池，這是曝鹽的第一步。佇另外彼頭提「鹽收仔」咧收鹽的陳玉簽，仝款對少年做到這馬。
Lāu iâm-kang Tôo Ting-sìn, ta̍k-kang tu kiông-hong, phah-khui tsuí-mn̂g, hōo hái-tsuí lâu-ji̍p tsing-huat-tî, tse sī pha̍k-iâm ê tē-it pōo.Tī līng-guā hit-thâu the̍h “iâm-siu-á” teh siu iâm ê Tân Gio̍k-tshiam, kâng-khuán tuì siàu-liân tsò-kàu tsit-má.
陳玉簽
風吹日曝，寒人，雷公熾爁也著閣出來崁鹽。
Hong tshue ji̍t pha̍k, kuânn--lâng, luî-kong sih-nà iā tio̍h koh tshut-lâi khàm iâm.
賒米啦，賒魚仔賒肉啦。領鹽錢才提來還啊，提來還數啊，都靠曝鹽咧生活啊
Sia bí--lah, sia hî-á sia bah-lah. Niá iâm tsînn tsiah the̍h lâi hîng--ā, the̍h lâi hîng-siàu--ā, to khò pha̍k-iâm leh sing-ua̍h--ā.
這是早期鹽工看天食飯的生活實況，佇台南北門的井仔腳鹽埕，是用坩柿仔鋪底，避免佮塗肉接觸，所生產出來的鹽粒仔幼閣白，自按呢出名。
Tse sī tsá-kî iâm-kang khuànn-thinn tsia̍h-pn̄g ê sing-ua̍h si̍t-hóng, tī Tâi-lâm Pak-mn̂g ê Tsénn-á-kha iâm-tiânn, sī īng khann-phuè-á phoo-té, pī-bián kap thôo-bah tsiap-tshiok, sóo sing-sán--tshut-lâi ê iâm-lia̍p-á iù koh pe̍h, tsū án-ne tshut-miâ.
步驟(進水，蒸發，高低鹵，收鹽，集鹽)
陳玉簽
埕架仔攄予較清氣，啊水好，水差不多二三十度水，攄予較清氣，欲收就較白。
Iâm kè-á lu hōo khah tshing-khì, ah tsuí hó, tsuí tsha-put-to jī-sann-tsa̍p tōo tsuí, lu hōo khah tshing-khì, beh siu tō khah pe̍h.
海水激的較甘頭，較汫氣啦。
Hái-tsuí kik--ê khah kam-thâu, khah tsiánn-khì--lah.
鹽場(cg鹽田簡介)
洪有志
塗埕有一个好處就是伊的生產量會當足大，用機械式落去採收，毋過坩柿仔埕一定愛用人工落去收，所以以早井仔腳遮全部差不多百分之百、百分之九十幾攏是人工落去收的。
Thôo-tiânn ū tsi̍t-ê hó-tshù tō-sī i ê sing-sán liōng ē-tàng tsiok tuā, īng ki-hâi-sik lo̍h-khì tshái-siu, m̄-koh khann-phuè-á tiânn it-tīng ài īng lâng-kang lo̍h-khì siu, sóo-í í-tsá Tsénn-á-kha tsia tsuân-pōo tsha-put-to pah-hun-tsi pah, pah-hun-tsi káu-tsa̍p-kuí lóng-sī lâng-kang lo̍h-khì siu--ê.
導覽
拋荒的鹽埕，佇政府推動、民間參與下，轉型做觀光鹽場，予退休的老鹽工，有機會閣出跤手，也予出外的少年人，有回鄉拍拚的希望
Pha-hng ê iâm-tiânn, tī tsìng-hú tshui-tōng, bîn-kan tsham-ú hā, tsuán-hîng tsò kuan-kong iâm-tiûnn, hōo thè-hiu ê lāu iâm-kang, ū ki-huē koh tshut-kha-tshiú, iā hōo tshut-guā ê siàu-liân-lâng, ū huê-hiong phah-piànn ê hi-bāng.
洪有志
逐家若轉來有這个愛故鄉愛土地這片情，咱就會當共這个故鄉經營予好勢，保護這个環境。
Ta̍k-ke nā tńg--lâi ū tsit-ê ài kòo-hiong ài thóo-tē tsit phiàn tsîng, lán tō ē-tàng kā tsit-ê kòo-hiong king-îng hōo hó-sè, pó-hōo tsit-ê khuân-kíng.
陳玉簽
台灣干焦遮咧曝鹽。老矣啦，有工課做就好啦，就滿意矣啦。攏老的老，轉去的轉去矣按呢啦。
Tâi-uân kan-ta tsia leh pha̍k-iâm. Lāu--ah-lah, ū khang-khuè tsò tō hó--lah, tō buán-ì--ah -lah .Lóng lāu--ê lāu, tńg--khì ê tńg--khì-ah án-ne--lah.
包巾內的老鹽工，面頂的汗水，就親像耙仔底的粗鹽，先苦後甘，黃昏的日頭，白鑠鑠的鹽山，嘛現出鹽工共同的曝鹽記持。
Pau-kin lāi ê lāu iâm-kang, bīn-tíng ê kuānn-tsuí, tō tshin-tshiūnn pê-á té ê tshoo-iâm, sing khóo āu kam, hông-hun ê ji̍t-thâu, pe̍h-siak-siak ê iâm-suann, mā hiàn-tshut iâm-kang kiōng-tông ê pha̍k-iâm kì-tî.
余榮宗 台南報導
沒有留言:
張貼留言