【技藝101】做。繡花鞋

佇古早，繡花鞋是考驗女子的手藝，麻是好額人的身份象徵，佇高雄有一個老師傅陳仲和，伊做出的繡花鞋，美又好穿，不怕國外廉價品競爭，一甲子ê功力，予真濟老客戶獨獨欲穿伊做ê鞋。

中美斷交，tsua̋nn美援無過，提he鞋仔--honnh，出來hōo我做
Tiong Bí tuān-kau, tsua̋nn Bí-uān bô kuè, the̍h he ê-á--honnh, tshut-lâi hōo guá tsò.

鞋做好阮就欲家己看，看講做按呢會使--袂，毋是講想講有錢趁就好--ah
Ê tsò hó guán tō beh ka-kī khuànn, khuànn kóng tsò án-ne ē-sái--bē, m̄-sī kóng siūnn kóng ū tsînn thàn tō hó--ah.

高雄愛河邊ê舊市場，走色ê kha̋n-páng，現出時代ê痕跡，狹細ê巷仔底，是繡花鞋師傅陳仲和做工課ê所在，老罔老，手工巧氣活跳，是繡花鞋技藝ê干證
Ko-hiông Ài-hô-pinn ê kū tshī-tiûnn, tsáu-sik ê kha̋n-páng, hiàn-tshut sî-tāi ê hûn-jiah, ue̍h-suè ê hāng-á-té, sī siù-hue-ê sai-hū Tân Tiōng-hô tsò khang-khuè ê sóo-tsāi, lāu bóng lāu, tshiú-kang khá-khì ua̍h-thiàu, sī siù-hue-ê ki-gē ê kan-tsìng.

攏有錢人，攏海軍hia較濟，hit陣一雙繡花鞋--honnh，tse攏踮tsia做--ê，一个師傅一日做五雙，你早起時7點抑是8點來，你一定做到7.8點才五雙做好
Lóng ū-tsînn-lâng, lóng hái-kun hia khah tsē, hit-tsūn tsi̍t siang siù-hue-ê--honnh, tse lóng tiàm tsia tsò--ê, tsi̍t ê sai-hū tsi̍t ji̍t tsò gōo siang, lí tsái-sî tshit tiám a̍h-sī peh tiám lâi, lí it-tīng tsò kàu tshit-peh tiám tsiah gōo siang tsò hó.

較早有官夫人佮好額人某相趁相喊，繡花鞋真時行，陳仲和13.4歲學做師仔，挑花刺繡（thio-hue tshiah-siù），款式無人有，一甲子ê功力，予真濟老客戶獨獨欲穿伊ê鞋
Khah tsá ū kuann-hu-jîn kap hó-gia̍h-lâng-bóo sio-thàn sio-hán, siù-hue-ê tsin sî-kiânn, Tân Tiōng-hô tsa̍p-sann-sì huè o̍h tsò sai-á, thio-hue tshiah-siù, khuán-sik bô lâng ū, tsi̍t kah-tsú ê kong-li̍k, hōo tsin tsē lāu-kheh-hōo to̍k-to̍k beh tshīng i ê ê.

註解：
相趁相喊：『互相模仿』。

伊講我大陸買一雙--honnh，真正有夠歹穿，伊一雙千五箍爾爾，阮tse一雙5.6000箍，伊甘願來tsia買，物件好bái，穿--lueh才會知
I kóng guá Tāi-lio̍k bé tsi̍t siang--honnh, tsin-tsiànn ū-kàu pháinn tshīng, i tsi̍t siang tshing-gōo khoo niā-niā, guán tse tsi̍t siang gōo-la̍k-tshing khoo, i kam-guān lâi tsia bé, mn̍gh-kiānn hó bái, tshīng--lueh tsiah ē tsai.

步驟

第一代先咱愛家己看，看講咱這雙鞋家己有滿意--無，若滿意--ah，人客毋才會出手，啊你家己都袂滿意--ah，人thài會接受
Tē-it tāi-sing lán ài ka-kī khuànn, khuànn kóng lán tsit siang ê ka-kī ū buán-ì--bô, nā buán-ì--ah, lâng-kheh m̄-tsiah ē tshut-tshiú, ah lí ka-kī to bē buán-ì--ah, lâng thài-ē tsiap-siū.

成品

除了明華園是老主顧，閣有道士抑是陣頭，見若手工鞋攏揣對伊tsia來，雖然市草袂bái，欲傳承煞真oh
Tû-liáu Bîng-huâ-hn̂g sī lāu-tsú-kòo, koh ū tō-sū iah-sī tīn-thâu, kìnn-nā tshiú-kang-ê lóng tshuē tuì i tsia lâi, sui-jiân tshī-tsháu bē-bái, beh thuân-sîng suah tsin oh.

註解：
朝鞋：司公穿ê鞋仔，『道士鞋』

學師仔足濟欲學--ê，啊但是--honnh，我講恁無堪按呢，按怎，袂忍耐啦，這馬人欲趁錢---啊，畢業，學--一-兩-個-月-仔，看會曉--袂，啊你叫伊學tsiah久哪有可能--ê
O̍h sai-á tsiok tsē beh o̍h--ê, ah tān-sī--honnh, guá kóng lín bô kham án-ne, án-tsuánn, bē jím-nāi lah, tsit-má lâng beh thàn-tsînn--ah, pit-gia̍p, o̍h--tsi̍t-nn̄g-kò-gue̍h-á, khuànn ē-hiáu--bē, ah lí kiò i o̍h tsiah kú ná ū khó-lîng--ê?

佳哉，去日本讀冊ê後生，自細漢那淘那汰，to也沓沓仔學會曉--ah
Ka-tsài, khì Ji̍t-pún tha̍k-tsheh ê hāu-senn, tsū sè-hàn ná tô ná thuā, to iā ta̍uh-ta̍uh-á o̍h ē-hiáu--ah.

註解：
那淘那汰：『耳濡目染』

阮兒子會做，比人咧食頭路較好，食頭路你著伸手揣人提著錢，阮這毋免，這人著提來到厝予--咱
Guán hāu-sinn ē tsò, pí lâng leh tsia̍h-thâu-lōo khah hó, tsia̍h-thâu-lōo lí tio̍h tshun tshiú tshuē lâng the̍h-tio̍h tsînn, guán tse m̄-bián, tse lâng tio̍h the̍h lâi kàu tshù hōo--lán.

有捌交易ê市仔，干焦賰半光暗ê電火，佳哉老藝師真樂觀，予繡花鞋傳kah tann，佇記持ê所在，留這个好光景。
Ū bat ka-ia̍h ê tshī-á, kan-tann tshun puànn-kng-àm ê tiān-hué, ka-tsài lāu-gē-su tsin lo̍k-kuan, hōo siù-hue-ê thuân kah tann, tī kì-tî ê sóo-tsāi, lâu tsit-ê hó kong-kíng.

註解：
交易（ka-ia̍h）：鬧熱繁華
記持：記憶

記者 余榮宗 高雄報導
Kì-tsiá Î Îng-tsong Ko-hiông pò-tō.