【技藝101】修繕。老傢俱

彰化有一位專門在修理老傢俱的師傅，從清朝的古董到現代傢俱，不管損壞到什麼程度，到他手上就能重獲新生，也因為每件送來的傢俱，都是主人珍貴的記憶。

誠媠啊，無修理--起-來拍損啊
Tsiânn suí--ā, bô siu-lí--khí-lâi phah-sńg--ā.

伊若無我修理--的honnh，伊袂合。
I nā-bô guá siu-lí--ê honnh, i buē ha̍h.

行入徐坤潔的工場，看--著-的是一項閣一項破鬖（phuà-sàm）、需要修理的老家具，歲月留--落-來的痕跡，是主人以早的記持，會來到遮，毋是因為價值偌濟，是伊背後的感情。
Kiânn-ji̍p Tshî Khun-kiat ê kang-tiûnn, khuànn--tio̍h-ê sī tsi̍t-hāng koh tsi̍t-hāng phuà-sàm, su-iàu siu-lí ê lāu ka-khū, suè-gua̍t lâu--lo̍h-lâi ê hûn-jiah, sī tsú-lâng í-tsá ê kì-tî, ē lâi kàu tsia, m̄-sī in-uī kè-ta̍t luā-tsē, sī i puē-āu ê kám-tsîng.

In阿媽抑是in siâng.留--落-來-的，伊欲修理起來做記念。親像，有--無？Hiâ，一兩座櫥仔honnh，就是按呢啊。
In a-má a̍h-sī in siâng. lâu--lo̍h-lâi-ê, i beh siu-lí khí-lâi tsuè kì-liām. Tshin-tshiūnn, ū--bô？Hiâ, tsi̍t nn̄g tsō tû-á honnh, tō-sī án-ni--ā.

對清朝的窗花，到近代的紅眠床，已經修理老家具三十外年的徐坤潔，佇伊的手--裡閣恢復原貌的家具算袂了，真濟是別人修理袂好--的，路尾揣到伊遮來。
Tuì Tshing-tiâu ê thang-hue, kàu kīn-tāi ê âng-bîn-tshn̂g,í-king siu-lí lāu ka-khū sann-tsa̍p guā nî ê Tshî Khun-kiat, tī i ê tshiú--nih koh hue-ho̍k guân-māu ê ka-khū sǹg lóng bē liáu, tsin-tsē sī pa̍t-lâng siu-lí bē hó--ê, lōo-bué tshuē kàu i tsia lâi.

我修理遐濟年honnh，物件提--來形體honnh會使算講幾若百種--lah，有的提--來講啊你這个形體你毋知欲按怎做，但是形體提--來我就知影講這个就是做按怎、鬥按怎--起-來。
Guá siu-lí hiah-tsē nî honnh, mi̍h-kiānn the̍h--lâi hîng-thé honnh ē-sái sǹg kóng kuí-nā pah tsióng--lah, ū-ê the̍h--lâi kóng ah lí tsit-ê hîng-thé lí m̄-tsai beh án-tsuánn tsuè, tān-sī hîng-thé the̍h--lâi guá tō tsai-iánn kóng tsit-ê tō-sī tsuè án-tsuánn, tàu án-tsuánn--khí-lâi.

步驟
起線--nòo啥物，honnh啊伊這个圓度愛做佮伊siāng款，起--來毋才會像按呢規組好好，若像講無去予歹--去仝款。
Khí-suànnn--òo siánn-mi̍h, honnh ah i tsit-ê înn-tōo ài tsò kap i siāng-khuán, khí--lâi m̄-tsiah ē tshiūnn án-ne kui-tsoo hó-hó, ná-tshiūnn kóng bô khì hōo pháinn--khì kāng-khuán.

作品
逐个寸尺，逐位接縫，徐坤潔攏足斟酌，定著愛回復到上好的狀態，藝師的使命，就是希望予遮的老物件，會得閣有機會閣轉去到主人的身軀邊。
Ta̍k-ê tshùn-tshioh, ta̍k-uī tsiap-phāng, Tshî Khun-kiat lóng tsiok tsim-tsiok, tiānn-tio̍h ài huê-ho̍k kàu siōng-hó ê tsòng-thài, gē-su ê sú-bīng,tō-sī hi-bāng hōo tsia-ê lāu mi̍h-kiānn, ē-tit koh ū ki-huē koh tńg-khì kàu tsú-lâng ê seng-khu pinn.

咱物件kā人做好做媠，人呵咾咱心情一定真正好的啊，真正輕鬆的啊。咱做物件就是愛予人會呵咾啊。
Lán mi̍h-kiānn kā lâng tsò hó tsò suí, lâng o-ló lán sim-tsîng it-tīng tsin-tsiànn hó--ê-ā, tsin-tsiànn khin-sang--ê-ā.Lán tsò mi̍h-kiānn tō-sī ài hōo lâng ē o-ló--ā.

毋過光榮的背後嘛有隱憂，舊記持無法度用新的取代，就親像伊的好工夫嘛無地傳承，徐坤潔煩惱技藝失傳，若像工場內的家具，罩一沿塗粉失去光彩。
M̄-koh kong-îng êpuè-āu suah-ū ín-iu, kū kì-tî bô-huat-tōo īng sin--ê tshú-tāi, tsiū tshin-tshiūnn i ê hó kang-hu iā bô-tè thuân-sîng, Tshî Kiat-khun huân-ló ki-gē sit-thuân, ná-tshiūnn kang-tiûnn lāi ê ka-khū, tà tsi̍t-iân thôo-hún sit-khì kong-tshái.

彼嘛無法度neh，著--m̄？家己的囝都無愛--囉啊。老的會漸漸無--去啊，最後無法度thang做，我才有無做。
He mā bô-huat-tōo neh, tio̍h--m̄？Ka-kī ê kánn to bô-ài--looh-ā. Lāu--ê ē tsiām-tsiām bô--khì -ā, tsuè-āu bô-huat-tōo thang tsuè, guá tsiah ū bô tsuè.

余榮宗 彰化報導