【技藝101】修理。鐘錶

庄腳鐘錶店 時光和刻度的人生故事

在台南庄腳，修理鐘錶超過一甲子，已經88歲的師傅，現在還在開店, 他還蒐集了一百多隻古董鐘，走進他的鐘錶行，就好像到了時鐘博物館，來看技藝101。

編輯 / 余榮宗、黃能揚、李江却台語文教基金會 陳豐惠 劉承賢

(歲月的修護家)
時間袂準人客也嫌，啊你若拄拄仔恬--去抑是按怎人也嫌
Sî-kan bē-tsún lâng-kheh iā hiâm, ah lí nā tú-tú-á tiām--khì ia̍h-sī án-tsuánn lâng iā hiâm.

(轉動的世界)
舊時鐘咧做古董毋，啊做古董伊就對錶仔店來
Kū sî-tsing teh tsò kóo-tóng m̄, ah tsò kóo-tóng i tō tuì pio-á-tiàm lâi.

修理鐘錶(台南 墨林村)

Os
逐工透早，已經有88歲ê鐘錶師傅殷瑞祥，準時開門，透過譀鏡，掌握毫釐世界。十五歲開始修理時鐘手錶，有一流ê工夫，所以就準嘉義ê庄跤離in hia有一tè-仔，嘛因為人相報喙，一逝路來kā交關。

Ta̍k-kang thàu-tsá, í-king ū peh-tsa̍p peh huè ê tsing-pió sai-hū In Suī-siâng, tsún-sî khui-mn̂g, thàu-kuè hàm-kiànn, tsiáng-ak hô-lî sè-kài. Tsa̍p-gōo huè khai-sí siu-lí sî-tsing tshiú-pió, ū it-liû ê kang-hu, sóo-í tō-tsún Ka-gī ê tsng-kha lī in hia ū tsi̍t-tè--à, mā in-uī lâng sio-pò-tshuì, tsi̍t-tsuā-lōo lâi kā kau-kuan.

註解：
譀鏡（hàm-kiànn）：『放大鏡』

庄跤罔庄跤，我ê生理誠好呢，咱欲過三頓都誠好過--ah啦，啊欲趁--兩-sian-錢-仔有，按呢niâ啦
Tsng-kha bóng tsng-kha, guá ê sing-lí tsiânn hó--neh, lán beh kuè sann-tǹg to tsiânn hó-kuè--ah-lah, ah beh thàn nn̄g--sian-tsînn-á ū, án-ne niâ--lah.

Os
逐粒螺絲仔，逐片車齒仔，殷瑞祥攏細膩斟酌kā裝倒轉-去，假使有淡薄仔失覺察，時鐘就會走精，修理手錶仔除了耐性，幼路ê所在閣較袂用得馬馬虎虎，毋過嘛是因為伊「龜毛」ê個性，才會予人客即爾仔信用--伊。
Ta̍k-lia̍p lôo-si-á, ta̍k-phìnn tshia-khí-á, In Suī-siâng lóng sè-jī tsim-tsiok kā tsng tò tńg--khì, ká-sú ū tām-po̍h-á sit-kak-tshat, sî-tsing tō ē tsáu-tsing, siu-lí tshiú-pió-á tû-liáu nāi-sìng, iù-lōo ê sóo-tsāi koh-khah bē-īng-tit má-má-hu-hu, m̄-koh mā sī in-uī i ‘ku-moo’ ê kò-sìng, khah ē hōo lâng-kheh tsiah-nī-á sìn-iōng--i.

明明咱都現看就無按怎，啊伊會kā你恬--啊，愛了工閣剝閣巡--啊，剝5遍3遍你照常愛剝喔，你無剝--lueh，彼粒錶仔咱袂當kā巡--出-來-啊
Bîng-bîng lán hiān khuànn tō bô án-tsuánn, ah i ē kā lí tiām--ah, ài liáu-kang koh pak koh sûn--ah, pak gōo piàn sann piàn lí tsiàu-siông ài pak--ooh, lí bô pak--lueh, hit-lia̍p pió-á lán bē-tàng kā sûn--tshut-lâi-ah.

老時鐘(滴答聲)音樂

Os
時間一下仔到，時鐘報時ê聲做一睏霆--起-來，袂輸交響樂仝款hiah-nī仔鬧熱。
Sî-kan tsi̍t-ē-á kàu, sî-tsing pò-sî ê siann tsò-tsi̍t-khùn tân--khí-lâi, bē-su kau-hiáng-ga̍k hiah-nī-á lāu-jia̍t.


這馬是咧做tsia-ê號做古董時鐘niâ，啊無，tsia-ê舊底ê生理攏袂做--得-ah，新--ê也無人買啦，啊也毋免修理啊
Tsit-má sī teh tsò tsia-ê hō-tsò (ā-tsò) kóo-tóng sî-tsing niâ, ah bô, tsia-ê kū-té ê sing-lí lóng bē-tsò--tit-ah, sin--ê iā bô-lâng bé--lah, ah iā m̄-bián siu-lí--ah.

Os
因為興趣，殷瑞祥有收集超過一百隻古董時鐘，伊好禮仔照顧，予逐隻都正常運作，數百年ê歷史，吸引遊客來tsia參觀，講伊是國寶，老師傅煞顧謙講：
In-uī hìng-tshù, In Suī-siâng ū siu-tsi̍p tshiau-kuè tsi̍t-pah tsiah kóo-tóng sî-tsing, i hó-lé-á tsiàu-kòo, hōo ta̍k-tsiah to tsìng-siông ūn-tsok, sòo-pah-nî ê li̍k-sú, khip-ín iû-kheh lâi tsia tsham-kuan, kóng i sī kok-pó, lāu-sai-hū suah kòo-khiam kóng:

做工ê師傅啦，啥mih咧國寶。唉！攏講這句我攏毋敢聽
Tsò-kang ê sai-hū--lah, siánn-mih teh kok-pó. Aih! Lóng kóng tsit kù guá lóng m̄-kánn thiann.

食老無做也較無要緊，iáu無，你就欲餓--死-ah 112208後擺我看uân-nā無--ah-nooh，無人欲做--ah啦
Tsia̍h-lāu bô tsò iā khah bô-iàu-kín, iáu bô, lí tō beh gō--sí-ah. Āu-pái guá khuànn uân-nā bô--ah-nooh, bô-lâng beh tsò--ah-lah.

Os
指針轉踅88冬久，老師傅ê熱情原在 踅緊緊 徛sīm無停，雖然較罕有人送鐘錶來修理--ah，伊猶原逐工開門，殷瑞祥講，望有經過ê人入來坐坐咧，做伙分享這个輾輾gô ê世界。
Tsí-tsiam tńg-se̍h peh-tsa̍p peh tang kú, lāu-sai-hū ê jia̍t-tsîng guân-tsāi se̍h kín-kín khiā-sīm bô-thîng, sui-jiân hán ū lâng sàng tsing-pió lâi siu-lí--ah, i iû-guân ta̍k-kang khui-mn̂g, bāng ū king-kuè ê lâng ji̍p-lâi tsē-tsē--leh, tsò-hué hun-hiáng tsit-ê lìn-lìn-gô ê sè-kài.

註解：
徛sīm：華語『靜止不動』，也用來說『陀螺快速旋轉靜止在一點的樣子』，這裡即是取這個意思。
輾輾gô（lìn-lìn-gô）：一直轉踅。

記者 余榮宗 台南報導
Kì-tsiá Î Îng-tsông Tâi-lâm pò-tō