看世事講台語：共天公借膽

PNNPTS 於 2011-03-29 上傳
"看世事講台語"單元所有影片及文字，是公共電視及李江却台語文教基金會合作製作。歡迎大家 link 做非營利教學使用。

標題：
赤崁樓步道 墓牌踏跤下
Tshiah-khàm-lâu pōo-tō, bōng-pâi ta̍h kha-ē
以早有整修 市府怎驗收
Í-tsá ū tsíng-siu, Tshī-hú tsuánn giām-siu

諺語：共天公借膽
Kā thinn-kong tsioh tánn
啥物人遐好膽，曷（ā）敢偷挖墓牌賣--人，敢講是共天公借膽？貪財嘛毋通做這款僥倖（hiau-hīng）的代誌！

內文：
真正是墓牌neh
Tsin-tsiànn sī bōng-pâi neh
頂面有字neh
Tíng-bīn ū jī neh
一早起
Tsi̍t tsái-khí
台南市政府就派人
Tâi-lâm Tshī-tsìng-hú tō phài lâng
kā所有的地板反（píng）開
kā sóo-ū ê tē-pán píng khui
一塊一塊倚佇壁邊
tsi̍t-tè tsi̍t-tè uá tī piah pinn
欲清查看覓仔所有的步道石枋
beh tshing-tsa khuànn-māi-á sóo-ū ê pōo-tō tsio̍h-pang
敢猶閣有墓牌
kám iáu-koh ū bōng-pâi
台南市國定的一級古蹟赤崁樓
Tâi-lâm-tshī kok-tīng ê it-kip kóo-tsik Tshiah-khàm-lâu
去予民眾發現用墓牌舖步道
khì hōo bîn-tsiòng huat-hiān īng bōng-pâi phoo pōo-tō
當場驚著
tong-tiûnn kiann--tio̍h
更加批評台南市政府
kìng-ka phue-phîng Tâi-lâm Tshī-tsìng-hú
無尊重往生的人
bô tsun-tiōng óng-sing ê lâng
(余基吉科長 台南市文化局)
文昌閣本身是佇81年就整修
Bûn-tshiong-koh pún-sin sī tī peh-tsa̍p-it nî tō tsíng-siu
整修了後
tsíng-siu liáu-āu
伊這个遺址
i tsit-ê uî-tsí
可能佇下底重做一个鋪面
khó-lîng tī ē-té tîng tsò tsi̍t-ê phoo-bīn
到底這个石材來源是按怎
Tàu-té tsit-ê tsio̍h-tsâi lâi-guân sī án-tsuánn
阮目前咧做調查
guán bo̍k-tsîng teh tsò tiau-tsa
國內外有名的景點赤崁樓
Kok-lāi-guā ū-miâ ê kíng-tiám Tshiah-khàm-lâu
一年有上百萬的人來遮tshit迌
tsi̍t nî ū tsiūnn pah-bān ê lâng lâi tsia tshit-thô
這馬竟然去予人發現
tsit-má kíng-jiân khì hōo lâng huat-hiān
用墓牌做步道
īng bōng-pâi tsò pōo-tō
台南市文化局趕緊
Tâi-lâm-tshī Bûn-huà-kio̍k kuánn-kín
kā所有的石枋徙開
kā sóo-ū ê tsio̍h-pang suá khui
就驚造成遊客無好的感覺
tō kiann tsō-sîng iû-kheh bô-hó ê kám-kak
(余基吉科長 台南市文化局)
目前全部反起來
Bo̍k-tsîng tsuân-pōo píng--khí-lâi
紲落閣檢查看覓
suà--lo̍h koh kiám-tsa khuànn-māi
仝款會重閣
kâng-khuán ē tîng koh
kā這个路面重新kā伊做予整齊
kā tsit-ê lōo-bīn tîng-sin kā i tsò hōo tsíng-tsê
閣經過市府人員詳細清點了後
Koh king-kuè Tshī-hú jîn-uân siông-sè tshing-tiám liáu-āu
確定有兩塊石枋是墓牌
khak-tīng ū nng-tè tsio̍h-pang sī bōng-pâi
為啥物步道會出現墓牌
uī-siánn-mi̍h pōo-tō ē tshut-hiān bōng-pâi
是對佗位來
sī tuì tó-uī lâi
市府猶閣愛調出當初整修的資料
Tshī-hú iáu-koh ài tiàu-tshut tong-tshoo tsíng-siu ê tsu-liāu
調查驗收的過程敢有確實
tiau-tsa giām-siu ê kuè-thîng kám-ū khak-si̍t
而且愛進一步追查
jî-tshiánn ài tsìn-tsi̍t-pōo tui-tsa
敢有行政的疏失
kám-ū hîng-tsìng ê soo-sit