2012年6月12日 星期二

看世事講台語:阿公娶某 家(加)婆


PNNPTS 於 2011-04-14 上傳
本單元是公視新聞部佮李江却台語文教基金會合作製作,歡迎 link 做非營利使用。

新聞標題:畢業典禮綜藝化 教育部呼籲節制
教育部發函指導 敢會干涉傷過頭

諺語:阿公娶某──家(加)婆
A-kong tshuā-bóo──ke-pô
這句是孽詰仔話(就是華語的『歇後語』),「阿公娶某」,厝內毋就「加」一个「婆」。用佇這條新聞就是講,教育部敢是「蹛海邊」的?哪會管遐闊?連學校舉辦畢業典禮欲按怎¬設計舖排,也欲干涉?遮家婆!

內文:
舊年有校長佇畢業典禮變妝
Kū-nî ū hāu-tiúnn tī pit-gia̍p-tián-lé piàn-tsng
跳天鵝湖引起爭議
thiàu "Thian-gô-ôo" ín-khí tsing-gī

前暨南大學校長李家同
Tsîng Kì-lâm tāi-ha̍k hāu-tiúnn Lí Ka-tông
就公開批評
tō kong-khai phue-phîng
畢業典禮已經若像是暗會
pit-gia̍p-tián-lé í-king ná-tshiūnn sī àm-huē
學生仔干焦想欲好耍 無夠尊嚴
ha̍k-sing-á kan-ta siūnn-beh hó-sńg,bô-kàu tsun-giâm
教育部誠重視
Kàu-io̍k-pōo tsiânn tiōng-sī
最近發函予所有學校
tsuè-kīn huat-hâm hōo sóo-ū ha̍k-hāu
要求學校應該以回顧 感恩 祝福
iau-kiû ha̍k-hāu ing-kai í huê-kòo, kám-un, tsiok-hok
三大目的來辦畢業典禮
sann tuā bo̍k-tik lâi pān pit-gia̍p-tián-lé
嘛訂出參考原則
mā tìng-tshut tsham-khó guân-tsik
外界批評敢是管甲傷幼囉
guā-kài phue-phîng kám-sī kuán kah siunn iù--looh
毋過教育部長強調
M̄-koh Kàu-io̍k-pōo-tiúnn kiông-tiāu
干焦欲提醒學校
kan-ta beh thê-tshénn ha̍k-hāu
畢業典禮應該愛回歸教育的本質
pit-gia̍p-tián-lé ing-kai ài huê-kui kàu-io̍k ê pún-tsit

*(吳清基 教育部長)
歡喜是應該有這个氣氛
Huann-hí sī ing-kai ū tsit ê khì-hun
毋過有時嘛毋通
m̄-koh ū-sî mā m̄-thang
共感恩 感謝老師彼種意義
kā kám-un kám-siā lāu-su hit tsióng ì-gī
共拍薄--去
kā phah-po̍h--khì
我是認為阮袂去介入
Guá sī jīn-uî guán bē khì kài-ji̍p
干焦是欲提醒學校儘量考慮著
kan-ta sī beh thê-tshénn ha̍k-hāu tsīn-liōng khó-lū tio̍h
學生的感受
ha̍k-sing ê kám-siū
家長的感受
ka-tiúnn ê kám-siū
老師的感受
lāu-su ê kám-siū

針對教育部白紙烏字
Tsiam-tuì Kàu-io̍k-pōo pe̍h-tsuá oo-jī
訂出畢業典禮辦理的原則
tìng-tshut pit-gia̍p-tián-lé pān-lí ê guân-tsik
有學校認為
ū ha̍k-hāu jīn-uî
按呢會使予學校做參考
án-ne ē-sái hōo ha̍k-hāu tsò tsham-khó
是講嘛有學生仔佮老師感覺
sī-kóng mā-ū ha̍k-sing-á kap lāu-su kám-kak
畢業典禮
pit-gia̍p-tián-lé
本來就算是學生仔的活動
pún-lâi tō sǹg-sī ha̍k-sing-á ê ua̍h-tāng
應該予學生仔家己主意
ing-kai hōo ha̍k-sing-á ka-kī tsú-ì
較歡喜 較活潑一下 無啥物毋著
khah huann-hí, khah hua̍t-phuat--tsi̍t-ē, bô siánn-mih m̄-tio̍h

* (學生)
畢業典禮本來就應該綜藝化
Pit-gia̍p-tián-lé pún-lâi tō ing-kai tsong-gē-huà
(為什麼)
因為畢業啊 愛較歡喜一下
In-uī pit-gia̍p--ah,ài khah huann-hí--tsi̍t-ē
* (學生)
這應該是學生自主的權利
Tse ing-kai sī ha̍k-sing tsū-tsú ê kuân-lī
嘛是學校 校方家己做代誌的態度
mā-sī ha̍k-hāu hāu-hong ka-kī tsò tāi-tsì ê thài-tōo
有顧安全就好
ū kòo an-tsuân tō hó

*(楊景德教授 台科大文化事業發展學系)
In一定會想講
In it-tīng ē siūnn-kóng
共in上好的經驗
kā in siōng-hó ê king-giām
四年來的經驗
sì-nî lâi ê king-giām
做一个上好的展現
tsò tsi̍t-ê siōng-hó ê tián-hiān
所以恁毋免替in操煩這
sóo-í lín m̄-bián thè in tshau-huân tse
恁去操煩恁的公務
lín khì tshau-huân lín ê kong-bū

家長團體嘛認為
Ka-tiúnn thuân-thé mā jīn-uî
教育部予學校一寡原則性的提醒
Kàu-io̍k-pōo hōo ha̍k-hāu tsi̍t-kuá guân-tsik-sìng ê thê-tshénn
就有夠囉
tō ū-kàu--looh
學校的畢業典禮
ha̍k-hāu ê pit-gia̍p-tián-lé
毋免變傷濟齣頭
m̄-bián pìnn siunn-tsē tshut-thâu
實在嘛無必要
si̍t-tsāi mā bô pit-iàu
揣一寡民意代表佮官員來致詞
tshuē tsi̍t-kuá bîn-ì-tāi-piáu kap kuann-uân lâi tì-sû

沒有留言:

張貼留言