閩南厝最完整聚落 金門維修團隊守護老厝
遊客到金門，可以看到很多傳統建築，跟台灣本島的三合院風格不同，這裡的建築更加強調閩南風味。所以金門是目前世界上閩南厝聚落保存最完整的地方。近來隨著新建築的出現，會修護老房子的師傅也越來越少，李清海是目前金門修建老厝的高手，同時他也把技術傳授給下一代，帶領著維修團隊，看守著這片土地的閩南厝。
厝欲修理ê時陣著愛先有構想
Tshù bueh siu-lí ê sî-tsūn tio̍h-ài sian ū kòo-sióng.
熱天就規日蹛厝頂直直曝，啊寒天--裡蹛hia搧風
Jua̍h-thinn tō kui-ji̍t tuà tshù-tíng ti̍t-ti̍t pha̍k, ah kuânn-thinn--ni̍h tuà hia siàn-hong.
Hông叫做「仙洲」ê金門，居民大多數是uì閩南遷徙到tsia徛起--ê，佇1600外年ê歷史當中，經過幾若擺ê戰爭，厝害--去-ê真濟，好佳哉tann保留文物ê意識時行，傳統建築ê款式嘛沓沓仔恢復
Hông kiò-tsò ‘Sian-tsiu’ ê Kim-mn̂g, ki-bîn tāi-to-sòo sī uì Bân-lâm tshian-suá kàu tsia khiā-khí--ê, tī tsi̍t-tshing la̍k-pah guā nî ê li̍k-sú tang-tiong, king-kuè kuí-nā-pái ê tsiàn-tsing, tshù hāi--khì-ê tsin tsē, hó-ka-tsài tann pó-liû bûn-bu̍t ê ì-sik sî-kiânn, thuân-thóng kiàn-tio̍k ê khuán-sik mā ta̍uh-ta̍uh-á khue-ho̍k.
政府啊，有補助啊，舊厝若修理，看獎勵你偌濟，舊早有做過這款工課，啊所以tsua̋n直直做，宮啦，書堂啦，古厝啦
Tsìng-hú--ah, ū póo-tsōo--ah, kū-tshù nā siu-lí, khuànn tsiáng-lē lír juā-tsuē, kū-tsá ū tsuè kerè tsit-khuán khang-kherè, ah sóo-í tsua̋n ti̍t-ti̍t tsuè, king lah, sir-tn̂g lah, kóo-tshù lah.
古厝修理師傅李清海，少年ê時就綴人學工夫，tse hām一般咧起厝無仝，伊講:「起金門ê厝，事事項項攏愛捌，就算是做塗水嘛著會曉畫圖」
Kóo-tshù siu-lí sai-hū Lí Tshing-hái, siàu-liân ê sî tō tuè lâng o̍h kang-hu, tse hām it-puann teh khí-tshù bô-kâng, i kóng: ‘Khí Kim-mn̂g ê tshù, sū-sū-hāng-hāng lóng ài bat, tō sǹg sī tsò thôo-tsuí mā tio̍h ē-hiáu uē-tôo.
製圖
彼陣做這个古蹟ê時陣攏計計是，實際做--ê，啊實際做看厝欲怎仔做，啊來拍圖
Hit-tsūn tsuè tsit-ê kóo-tsik ê sî-tsūn lóng kè-kè sī, si̍t-tsè tsuè--ê, ah si̍t-tsè tsuè khuànn tshù bueh tsáinn-á tsuè, ah lâi phah-tôo.
老師傅傳授--落-來伊這个工法來做，這才叫做屬於講修理古蹟
Lāu-sai-hū thuân-siū--lo̍h-lâi i tsit-ê kang-huat lâi tsuè, tse tsiah kiò-tsuè sio̍k-î kóng siu-lí kóo-tsik.
一落兩攑頭、一落四攑頭、鰲頭、翹脊等等正身護龍ê建築風格，予uì台灣來ê彩繪師傅，嘛感覺有較複雜
Tsi̍t lo̍h nn̄g gia̍h-thâu, tsi̍t lo̍h sì gia̍h-thâu, gô-thâu, khiàu-tsit tíng-tíng tsiànn-sin hōo-lîng ê kiàn-tio̍k hong-keh, hōo uì Tâi-uân lâi ê tshái-kuè sai-hū, mā kám-kak ū khah ho̍k-tsa̍p.
註解：
鰲頭：華語『（傳統建築）馬背』
翹脊：華語『（傳統建築）燕尾』
張添利
（台灣佮這金門有差無）無仝呢，建築方面呢，金門較複雜
（Tâi-uân kap tse Kim-mn̂g ū tsha--bô）Bô-kâng neh, kiàn-tio̍k hong-bīn neh, Kim-mn̂g khah ho̍k-tsa̍p.
兒子 李榮興
Á是感覺傳統ê建築較有味，新ê厝你行甲佗攏有tè看，但是閩南ê建築單仔金門較濟
Á-sī kám-kak thuân-thóng ê kiàn-tio̍k khah ū bī, sin ê tshù lír kiânn kah tió lóng ū tè khuànn, tān-sī Bân-lâm ê kiàn-tio̍k tuann-á Kim-mn̂g khah tsuē.
凡勢是傳統建築師傅ê種傳，李清海ê後生一下講著金門ê建築就足有神彩，爸仔囝嘛tiānn做伙討論欲按怎將閩南建築保留予閣較齊全
Huān-sè sī thuân-thóng kiàn-tio̍k sai-hū ê tsíng-thn̂g, Lí Tshing-hái ê hāu-senn tsi̍t-ē kóng-tio̍h Kim-mn̂g ê kiàn-tio̍k tō tsiok ū sîn-tshái, pē-á-kiánn mā tiānn tsò-hué thó-lūn beh án-tsuánn tsiong Bân-lâm kiàn-tio̍k pó-liû hōo koh-khah tsiâu-tsn̂g.
註解：
種傳（tsíng-thn̂g）：遺傳和爸母相仝ê性質
有神彩：華語『神采飛揚』
共指點，你這著改怎樣，這著改怎樣，手抄--ê也好，記持--ê也好，攏計計有傳授予--伊按呢
Kā tsí-tiám, lír tse tio̍h kái tsáinn-iūnn, tse tio̍h kái tsáinn-iūnn, tshiú-tshau--ê iā hó, kì-tî--ê iā hó, lóng kè-kè ū thuân-siū hōo--i án-ne.
兒子 李榮興
繼續保留咱金門ê傳統建築，地價咧起，逐家攏會無想欲保留，攏希望來起新ê厝來賣，來物--來，我感覺這tè是較無好--ê
Kè-sio̍k pó-liû lán Kim-mn̂g ê thuân-thóng kiàn-tio̍k, tē-kè leh khí, ta̍k-ke lóng bô siūnn-beh pó-liû, lóng hi-bāng lâi khí sin ê tshù lâi buē, lâi mi̍h--lâi, guá kám-kak tsit-tè sī khah bô-hó--ê.
建築是歷史上好ê號頭，時間咧行，建築就講起一篇一篇光陰ê故事，佇聚落巷路--裡，李清海師傅嘛仝時咧承續講古先ê傳承
Kiàn-tio̍k sī li̍k-sú siōng-hó ê hō-thâu, sî-kan teh kiânn, kiàn-tio̍k tō kóng-khí tsi̍t phinn tsi̍t phinn kong-im ê kòo-sū, tī tsū-lo̍h hāng-lōo--lí, Lí Tshing-hái sai-hū mā kāng-sî teh sîng-sio̍k kóng-kóo-sian ê thuân-sîng.
註解：
號頭：華語『標誌、記號、信號、商標、符號』
承續：繼承
講古先：講故事ê人；華語『說書人』。
記者 余榮宗 金門報導
Kì-tsiá Î Îng-tsong Kim-mn̂g pò-tō
沒有留言:
張貼留言