2013年12月6日 星期五

【技藝101】手工麵線




繁複手工麵線 鹹風與陽光曬出來

一進入到冬季,澎湖風便吹的呼呼作響,不過這項惡劣的天然因素,卻也是做手工麵線最好的助力,澎湖縣西衛,有一家已經超過百年歷史的麵線廠,五代以來堅持傳統手工製麵,每天清晨都要經過15道步驟,才能完成帶有天然鹹味的傳統麵線,在食安問題層出不窮的現在,這項只靠澎湖的鹹風和太陽所生產的銀白線條,卻更能顯得它的珍貴。

這个頭路雖然辛苦,毋過比外口做人辛勞--ê加足輕鬆
Tsit-ê thâu-lōo sui-jiân sin-khóo, m̄-koh pí guā-kháu tsò lâng sin-lô--ê ke tsiok khin-sang.

手工做ê時陣,一工百幾縛,做濟嘛無法度
Tshiú-kang tsò ê sî-tsūn, tsi̍t kang pah kuí pa̍k, tsò tsē mā bô-huat-tōo.

為著欲趕佇頂晡曝麵,王文泰翁仔某自透早就開始撋麵、抽麵條,in蹛佇澎湖西衛,經營手工麵線已經有五代hiah久--ah,真無拄好,今仔日無出日,王文泰講這途愛看天公伯--仔ê目色
Uī-tio̍h beh kuánn tī tíng-poo pha̍k mī, Ông Bûn-thài ang-á-bóo tsū thàu-tsá tō khai-sí nuá mī, thiu mī-tiâu, in tuà tī Phînn-ôo Sai-uē, king-îng tshiú-kang mī-suànn í-king ū gōo tāi hiah kú--ah, tsin bô tú-hó, kin-á-ji̍t bô tshut-ji̍t, Ông Bûn-thài kóng tsit-tôo ài khuànn thinn-kong-peh--à ê ba̍k-sik.

王文泰
傷過軟傷過澹,欲拗型ê時陣honnh,較無hiah媠,啊若較焦ê時陣honnh,比論講,型拗--出-來ê時陣honnh,加偌媠咧,啊閣加偌白咧,啊都愛等,看天食飯ê工課就是按呢
Siunn-kuè nńg siunn-kuè tâm, beh áu-hîng ê sî-tsūn honnh, khah bô hiah suí, ah nā khah ta ê sî-tsūn honnh, pí-lūn kóng, hîng áu--tshut-lâi ê sî-tsūn honnh, ke juā suí leh, ah koh ke juā pe̍h leh, ah to ài tán, khuànn thinn tsia̍h-pn̄g ê khang-khuè tō sī án-ni.

澎湖風透雨水少,無適合徛起,毋過顛倒足適合做麵線,西衛嘛發展做手工麵線ê中心,四界攏有人佇埕--裡曝白siak-siak ê麵線
Phînn-ôo hong thàu hōo-tsuí tsió, bô sik-ha̍p khiā-khí, m̄-koh tian-tò tsiok sik-ha̍p tsò mī-suànn, Sai-uē mā huat-tián tsò tshiú-kang mī-suànn ê tiong-sim, sì-kuè lóng ū lâng tī tiânn--lí pha̍k pe̍h-siak-siak ê mī-suànn.

王文泰
澎湖ê風,澎湖ê鹹水,啊澎湖ê日頭 103818 澎湖ê麵線做--出-來攏有淡薄仔海水ê味,像這種鹽水煙ê味,正清芳--ê
Phînn-ôo ê hong, Phînn-ôo ê kiâm-tsuí, ah Phînn-ôo ê ji̍t-thâu. Phînn-ôo ê mī-suànn tsò--tshut-lâi lóng ū tām-po̍h-á hái-tsuí ê bī, tshiūnn tsit-tsióng kiâm-tsuí-ian ê bī, tsiànn tshing-phang--ê.

王文泰
抽麵線,抽無好勢honnh,去hit號外口搝,伊liâm-mi就斷了--ah,根本無法度比論講按呢一tshik一tshik tsiah媠,像一匹布按呢,白蒼蒼幼mī-mī
Thiu mī-suànn, thiu bô hó-sè honnh, khì hit-hō guā-kháu giú, i liâm-mi tō tn̄g liáu--ah, kin-pún bô-huat-tōo pí-lūn kóng án-ni tsi̍t tshik tsi̍t tshik tsiah suí, tshiūnn tsi̍t phit pòo án-ni, pe̍h-tshang-tshang, iù-mī-mī.

太太 陳秀姿
嫁--過-來就開始做--ah,沓沓仔學啊 (會辛苦袂?) 你講會辛苦袂,我嫁--過-來了瘦10公斤
Kè--kuè-lâi tō khai-sí tsò--ah, ta̍uh-ta̍uh-á o̍h ah. (Ē sin-khóo bē?) Lí kóng ē sin-khóo bē, guá kè--kuè-lâi liáu sán tsa̍p kong-kin.

雖然陳秀姿講艱苦做,毋過伊其實是歡喜甘願--ê,捌有人建議王文泰改用機器趁著較緊,總--是人客信用--伊,加上伊ê堅持,伊無放棄手工生產
Sui-jiân Tân Siù-tsu kóng kan-khóo tsò, m̄-koh i kî-si̍t sī huann-hí kam-guān--ê, bat ū lâng kiàn-gī Ông Bûn-thài kái īng ki-khì thàn-tio̍h khah kín, tsóng--sī lâng-kheh sìn-iōng--i, ka-siōng i ê kian-tshî, i bô hòng-khì tshiú-kang sing-sán.

顧客
以早攏烏白買,買無合--ê,伊kā我介紹,我就走來買--ah,好食--ê,逐家都來tsia買
Í-tsá lóng oo-pe̍h bé, bé bô ha̍h--ê, i kā guá kài-siāu, guá tō tsáu lâi bé--ah, hó-tsiah--ê, ta̍k-ke to lâi tsia bé.

王文泰
自阮老母hit陣傳--落-來就是按呢做,這是一種傳承啦,你講改機器趁錢趁濟,對我家己來講無hit號意義--ah
Tsū guán lāu-bú hit-tsūn thuân--lo̍h-lâi tō sī án-ni tsò, tse sī tsi̍t tsióng thuân-sîng lah, lí kóng kái ki-khì thàn tsînn thàn tsē, tuì guá ka-kī lâi kóng bô hit-hō ì-gī--ah.

一條一條uì指頭仔huê--過,袂輸咧彈奏疼痛土地ê樂章,王文泰ná khiú ná幌,將阿母ê傳承顧tiâu咧,予白siak-siak ê線條,繼續佇澎湖ê日頭跤phū-phū飛
Tsi̍t tiâu tsi̍t tiâu uì tsíng-thâu-á huê--kuè, bē-su teh tuânn-tsàu thiànn-thàng thóo-tē ê ga̍k-tsiunn , Ông Bûn-thài ná khiú ná hàinn, tsiong a-bú ê thuân-sîng kòo tiâu leh, hōo pe̍h-siak-siak ê suànn-tiâu, kè-siok tī Phînn-ôo ê ji̍t-thâu-kha phū-phū-pue.

記者 余榮宗 澎湖報導
Kì-tsiá Î Îng-tsong Phînn-ôo pò-tō.

沒有留言:

張貼留言