【技藝101】做。皮鞋

百貨週年慶到了，民眾可以上門撿便宜挑一雙好鞋，不過現在想要買到一雙手工皮鞋卻很不容易了，在高雄有一條皮鞋街，以前是手工皮鞋的大本營，現在卻只剩下一家還在經營手工皮鞋，師傅也從輝煌期的30多人到現在剩下3人，不過他們是如何堅持這門功夫呢？那又要如何才能挑選一雙好鞋呢？來看這則報導。
國小畢業就開始做--ah，做40冬有--ah oo

Kok-sió pit-gia̍p tō khai-sí tsò--ah, tsò sì-tsa̍p tang ū--ah oo.

當好ê時陣，做kah過年閣做袂赴予--人

Tng hó ê sî-tsūn, tsò kah kuè-nî koh tsò bē-hù hōo--lâng.

逐工準時將鐵門thuah--開，櫥窗內底真濟無仝款ê鞋仔，閣呈現佇店頭，張振雄ê手工皮鞋店，佇高雄大連街開30外冬--ah，也見證皮鞋街起基ê過程

Ta̍k-kang tsún-sî tsiong thih-mn̂g thuah--khui, tû-thang lāi-té tsin tsē bô-kāng-khuán ê ê-á, koh thîng-hiān tī tiàm-thâu, Tiunn Tsín-hiông ê tshiú-kang phuê-ê-tiàm, tī Ko-hiông Tāi-liân-ke khui sann-tsa̍p guā tang--ah, iā kiàn-tsìng phuê-ê-ke khí-ki ê kuè-tîng.

老闆 張振雄
 Hit陣逐家攏做批發--ê啊，啊了，一直慢慢咧成形，逐家攏tsua̋nn咧裝潢店，啊裝潢店才成為一條街，當咧濟差不多倚70年hit陣，大連街有40幾間

Hit-tsūn ta̍k-ke lóng tsò phue-huat--ê ah, ah liâu, it-ti̍t bān-bān teh sîng-hîng, ta̍k-ke lóng tsua̋nn teh tsong-hông tiàm, ah tsong-hông tiàm tsiah sîng-uî tsi̍t tiâu ke, tng teh tsē tsha-put-to uá tshit-tsa̍p nî hit-tsūn, Tāi-liân-ke ū sì-tsa̍p kuí king.

佇家庭就是工場ê年代，大連街ê特色就已經建立--ah，高雄人欲買皮鞋攏會來tsia，手工和機器生產ê上大無仝，是佇tshiah皮鞋ê過程，會當照顧著逐个消費者ê跤

Tī ka-tîng tō sī kang-tiûnn ê nî-tāi, Tāi-liân-ke ê ti̍k-sik tō í-king kiàn-li̍p--ah, Ko-hiông-lâng beh bé phuê-ê lóng ē lâi tsia, tshiú-kang hām ki-khì sing-sán ê siōng-tuā bô-kâng, sī tī tshiah phuê-ê ê kuè-tîng, ē-tàng tsiàu-kòo-tio̍h ta̍k-ê siau-huì-tsiá ê kha.

註解：tshiah皮鞋：華語『訂製皮鞋』

試穿鞋

店員 
頭前嘛毋免楦闊，tsia敢袂傷過頭絚？

Thâu-tsîng mā m̄-bián hùn khuah, tsia kám bē siunn-kuè-thâu ân?

人客 
袂。 這感覺較好穿啊，當然一分錢一分貨啊。

Bē. Tse kám-kak khah hó tshīng ah, tong-jiân tsi̍t hun tsînn tsi̍t hun huè ah.

老闆 張振雄
跤大步拇遏彎，跤較肉跤--ê，有當時仔買鞋仔買便--ê，你頭前會穿--得咧，後壁傷冗，啊買拄仔好--ê頭前傷絚，我做--起-來ê鞋仔，符合你ê跤穿，好穿為準

Kha-tuā-pōo-bú at-uan, kha khah bah-kha--ê, ū-tang-sî-á bé ê-á bé piān--ê, lí thâu-tsîng ē tshīng--tit leh, āu-piah siunn līng, ah bé tú-á-hó--ê thâu-tsîng siunn ân, guá tsò--khí-lâi ê ê-á, hû-ha̍p lí ê kha tshīng, hó tshīng uî tsún.

步驟

師傅
照伊ê跤型lue̋h做，跤模啦，啊伊形體攏愛注意啊

Tsiàu i ê kha-hîng lue̋h tsò, kha-bôo lah, ah i hîng-thé lóng ài tsù-ì ah.

成品

師傅
少年--ê無欲學這--ah啦，大部分攏是女工化，抑無就機械化--ah，tsit-má手工ê物件honnh，較少人咧學--ah

Siàu-liân--ê bô beh o̍h tse--ah lah, tāi-pōo-hūn lóng sī lú-kang-huà, iah bô tō ki-hâi-huà--ah, tsit-má tshiú-kang ê mi̍h-kiānn honnh, khah tsió lâng teh o̍h--ah.

十幾个師傅啊（啊tsit-má咧）兩三个仔niâ，（啊這个過程）過程就bái啊，無法度生存就是按呢niâ

Tsa̍p-kuí-ê sai-hū ah. (Ah tsit-má leh.) Nn̄g-sann-ê-á niâ. (Ah tsit-ê kuè-tîng.) Kuè-tîng tō bái ah, bô-huat-tōo sing-tsûn tō sī án-ne niâ.

光景閣較好嘛拚袂過大間賣場ê競爭，張振雄ê鞋仔店，師傅uì 30外个，kah tann賰3个，咱就知手工tshiah皮鞋行落崎looh，毋過人客小呵咾--一-下，師傅就感覺有價值--ah

Kong-kíng koh-khah hó mā piànn bē kuè tuā-king bē-tiûnn ê kīng-tsing, Tiunn Tsín-hiông ê ê-á-tiàm, sai-hū uì sann-tsa̍p-guā ê, kah tann tshun sann ê, lán tō tsai tshiú-kang tshiah-phuê-ê kiânn lo̍h kiā--looh, m̄-koh lâng-kheh sió o-ló--tsi̍t-ē, sai-hū tō kám-kak ū kè-ta̍t--ah.

人客 
較好穿啊，較袂變形

Khah hó tshīng ah, khah bē piàn-hîng.

師傅
聽著tsia-ê話一定足歡喜--ê啊，感覺按呢做有hit个價值按呢啦

Thiann-tio̍h tsia-ê uē it-tīng tsiok huann-hí--ê ah, kám-kak án-ne tsò ū hit-ê kè-ta̍t án-ne lah.

老闆 張振雄
我堅持kah底啊，囡仔大漢--ah啊，我都做偌儕算偌儕，做kah我袂做為準

Guá kian-tshî kah té ah, gín-á tuā-hàn--ah ah, guá to tsò juā-tsē sǹg juā-tsē, tsò kah guá bē tsò uî-tsún.

有時星光，有時月光，無改變--ê，是欲kā逐雙跤揣著合跤（ha̍h-kha）ê厝，是欲予手工tshiah鞋ê技術會用得傳承，老師傅ê堅持，猶原顧守大連街唯一手工皮鞋ê榮光

Ū-sî tshinn kng, ū sî gue̍h kng, bô kái-piàn--ê, sī beh kā ta̍k-siang kha tshuē--tio̍h ha̍h-kha ê tshù, sī beh hōo tshiú-kang tshiah-ê ê ki-su̍t ē-īng-tit thuân-sîng, lāu-sai-hū ê kian-tshî, iû-guân kòo-siú Tāi-liân-ke î-it tshiú-kang phuê-ê ê îng-kng.

註解：
有時星光，有時月光：諺語，光是指「光景好，當風神」，字面ê意思是有時星較光，有時是月較光，就是華語『風水輪流轉』ê意思。

記者 余榮宗 高雄報導

Kì-tsiá Î Îng-tsong Ko-hiông pò-tō