【技藝101】糊紙

佇台灣，普度佮辦喪事，都會始用糊紙，不過，早期糊紙攏是運用在喜慶當中，技藝101要帶你到台南的百年糊紙店，已經做到第六代，第五代傳人洪銘宏為著欲改變逐家的觀念，佇伊每一个作品用盡工夫。洪銘宏的目的，是欲改變大家對「糊紙厝」的印象，欲替糊紙建立藝術價值。

我第五代，阮後生第六代啦，來到阮遮已經超過一百冬矣。
Guá tē-gōo tāi, guán hāu-senn tē-la̍k tāi--lah, lâi-kàu guán tsia í-king tshiau-kuè tsi̍t-pah tang--ah.

這个物件莫去予失傳啦。
Tsit-ê mi̍h-kiānn mài khì hōo sit-thuân--lah.

佇台南古都無顯目的店仔，洪銘宏爸仔囝當咧無閒剖竹、落色，為龍形神轎做裝飾，超過一百年的糊紙店，手工做的紙成品，煞佮逐家想的有寡無仝。
Tī Tâi-lâm kóo-too bô hiánn-ba̍k ê tiàm-á, Âng Bîng-hông pē-á-kiánn tng-teh bô-îng phuà tik, lo̍h-sik, uī lîng-hîng sîn-kiō tsò tsng-thānn, tshiau-kuè tsi̍t-pah nî ê kôo-tsuá tiàm, tshiú-kang tsò ê tsuá sîng-phín, suah kap ta̍k-ke siūnn--ê ū kuá bô-kâng.

古早咱的糊紙用途足大，大漢十六歲，結婚、做壽九成攏是屬糊紙內面的物件，一成才是帶喪的。
Kóo-tsá lán ê kôo-tsuá iōng-tôo tsiok tuā, tuā-hàn tsa̍p-la̍k huè, kiat-hun, tsò-siū káu siânn lóng-sī sio̍k kôo-tsuá lāi-bīn ê mi̍h-kiānn, tsi̍t siânn tsiah-sī tài song--ê.

毋知啥時陣起，傳統工藝佇時空的轉變下，糊紙煞予人認為是喪事才會出現的物仔，第五代傳人洪銘宏為著欲改變逐家的觀念，佇伊每一个作品用盡工夫。
M̄-tsai siánn sî-tsūn khí, thuân-thóngkang-gē tī sî-khong ê tsuán-piàn hā, kôo-tsuá suah hōo-lâng jīn-uî sī song-sū tsiah-ē tshut-hiān ê mi̍h-á, tē-gōo tāi thuân-jîn Âng Bîng-hông uī-tio̍h beh kái-piàn ta̍k-ke ê kuan-liām, tī i muí-tsi̍t ê tsok-phín iōng-tsīn kang-hu.

有的人觀念講這攏做死人的工課，結果毋是，阮是做一寡藝術，一寡民俗。
Ū ê lâng kuan-liām kóng tse lóng tsò sí-lâng ê khang-khuè, kiat-kó m̄-sī, guán sī tsò tsi̍t-kuá gē-su̍t, tsi̍t-kuá bîn-sio̍k.

步驟
成品做起來，伊的比例，伊的形體，伊的動作攏足重要。
Sîng-phín tsò--khí-lâi, i ê pí-lē, i ê hîng-thé, i ê tōng-tsok lóng tsiok tiōng-iàu.

成品
洪老師來共咱做蜈蚣閣來開路。品質真好，閣足活的，袂講按呢足死板的。
Âng lāu-su lâi kā lán tsò giâ-kang-koh lâi khui-lōo.Phín-tsit tsin hó, koh tsiok ua̍h--ê, bē kóng án-ne tsiok sí-pán--ê.

開光點眼了後，活跳跳的蜈蚣閣，予鹿港來的人客呵咾甲會觸舌，對家己的技術，洪銘宏真有自信，問伊扛百年的看板敢有壓力？ 伊講「唯一的壓力是來自傳承」。
Khai-kong tiám-gán liáu-āu, ua̍h-thiàu-thiàu ê giâ-kang-koh, hōo Lo̍k-káng lâi ê lâng-kheh o-ló kah ē tak-tsi̍h, tuì ka-kī ê ki-su̍t, Âng Bîng-hông tsin-ū tsū-sìn, mn̄g i kng pah-nî ê kha̋ng-páng kám ū ap-li̍k？i kóng “Î-it ê ap-li̍k sī lâi-tsū thuân-sîng”.

因為這个基業無去就永遠就無去矣。期望講後一代會當閣認真來學。
In-uī tsi̍t-ē ki-gia̍p bô--khì tō íng-uán tō bô--khì-ah.Kî-bāng kóng āu tsi̍t-tāi ē-tàng koh jīn-tsin lâi o̍h.

對爸爸的功夫先學起來，學起來閣慢慢仔轉變做閣較藝術的。
Tuì pa-pa ê kang-hu sing o̍h--khí-lâi, o̍h--khí-lâi koh bān-bān-á tsuán-piàn tsò koh-khah gē-su̍t--ê.

你無藝術的物件，粗工課，做著閣袂好看閣袂精彩袂趣味，你若有藝術的物件愈做愈爽快。
Lí bô gē-su̍t ê mi̍h-kiānn, tshoo khang-khuè, tsò tio̍h koh bē hó-khuànn koh bē tsing-tshái bē tshù-bī, lí nā-ū gē-su̍t ê mi̍h-kiānn jú tsò jú sóng-khuài.

洪銘宏拍拚欲改變干焦是「糊紙厝」的印象，欲替糊紙建立藝術價值，爸仔囝目標一致，就親像伊的店名，傳統紙藝，薪火相傳。
Âng Bîng-hông phah-piànn beh kái-piàn kan-ta sī “kôo-tsuá-tshù” ê ìn-siōng, beh thè kôo-tsuá kiàn-li̍p gē-su̍t kè-ta̍t, pē-á-kiánn bo̍k-phiau it-tì, tō tshin-tshiūnn in ê tiàm-miâ, thuân-thóng tsuá-gē, sin-hué siong-thuân.

余榮宗 台南報導