【技藝101】紙雕

一張紙的幸福 吳靜芳悠遊紙雕天地

南部的大太陽，應該是很多人避知唯恐不及的，不過卻有人是因為這個陽光而回到故鄉，紙雕家吳靜芳從台北回到嘉義後，用手上的一張紙重新出發，但是在紙雕的荒漠地區，一切都要靠自己，幸好甜蜜的負擔，在他的努力下，也慢慢在這裡開花結果，而她的作品也獲得各界的讚賞，來看紙雕家吳靜芳的故事。

我可能畫幾若百張，毋過無一張是我想欲共變做紙雕的。
Guá khó-lîng uē kuí-nā pah tiunn, m̄-koh bô tsi̍t tiunn sī guá siūnn-beh kā piàn-tsó tsuá-tiau--ê.

金錢是我頭一个放拺的物件，第二个放拺的是名利的部份。
Kim-tsînn sī guá thâu-tsi̍t ê pàng-sak ê mi̍h-kiānn, tē-jī ê pàng-sak--ê sī miâ-lī ê pōo-hūn.

畫甲足煩的時陣，就出來行，我愛鑽巷仔，看一寡較古早的厝。
Uē kah tsiok huân ê sî-tsūn, tō tshut-lâi kiânn, guá ài nǹg hāng-á, khuànn tsi̍t-kuá khah kóo-tsá ê tshù.

佇嘉義古蹟巷路散步，這是紙雕藝術家吳靜芳揣靈感的方式之一，原本佇台北做美術工課，煞因為傷過思念南部的日光，自按呢轉來故鄉，選擇紙雕，重新出發。
Tī Ka-gī kóo-tsik hāng-lōo sàn-pòo, tse sī tsuá-tiau gē-su̍t-ka Ngôo Tsīng-hong tshuē lîng-kám ê hong-sik tsi-it, guân-pún tī Tâi-pak tsò bí-su̍t khang-khuè, suah in-uī siunn-kuè su-liām lâm-pōo ê ji̍t-kng, tsū án-ne tńg-lâi kòo-hiong, suán-ti̍k tsuá-tiau, tiông-sin tshut-huat.

紙雕佇嘉義無人咧教，完全無人教，人連聽這兩字是啥物意思都聽無，後來我想講無人教，我就家己學啊。
Tsuá-tiau tī Ka-gī bô-lâng leh kà, uân-tsuân bô-lâng kà, lâng liân thiann tsit nn̄g jī sī siánn-mih ì-sù to thiann-bô, āu--lâi guá siūnn-kóng bô-lâng kà, guá tō ka-kī o̍h ah.

吳靜芳的紙雕創作，嘛是對仿別人的開始，日子久--來，藝術家的性格予伊開始思考，仿的閣較按怎媠，總--是別人的，無想著其實上好的題材，原來就佇身邊。
Ngôo Tsīng-hong ê tsuá-tiau tshòng-tsok, mā-sī tuì hóng pa̍t-lâng ê khai-sí, ji̍t-tsí kú--lâi, gē-su̍t-ka ê sìng-keh hōo i khai-sí su-khó, hóng--ê koh-khah án-tsuánn suí, tsóng--sī pa̍t-lâng ê, bô siūnn-tio̍h kî-si̍t siōng-hó ê tê-tsâi, guân-lâi tō tī sin-pinn.

因為我真想阮爸爸的時陣，我就會唱歌，我會佇心內唱歌，我的畫面就浮出來矣，所以就產生了台灣民謠系列。
In-uī guá tsin siūnn pa-pa ê sî-tsūn, guá tō ē tshiùnn-kua, guá ē tī sim-lāi tshiùnn-kua, guá ê uē-bīn tō phû--tshut-lâi-ah, sóo-í tō sán-sing liáu Tâi-uân bîn-iâu hē-lia̍t.

步驟
作品毋是做甲足幼就是媠，足複雜的物件攏做出來嘛毋是厲害，應該是講一个精神吧。
Tsok-phín m̄-sī tsò kah tsiok iù tō-sī suí, tsiok ho̍k-tsa̍p ê mi̍h-kiānn lóng tsò-- tshut-lâi mā m̄-sī lī-hāi, ing-kai sī kóng tsi̍t-ê tsing-sîn--pah.

作品

翁英慈
綴老師綴遮久矣，你對一開始袂曉，到這馬，做一幅作品出來的時陣，就感覺足有彼个成就感的。
Tuè lāu-su tuè tsiah kú--ah, lí tuì tsi̍t-khai-sí bē-hiáu, kàu tsit-má, tsò tsi̍t-pak tsok-phín tshut--lâi ê sî-tsūn, tō kám-kak tsiok ū sîng-tsiū-kám--ê.

我家己咧學紙雕的時陣，攏無人咧教，等我會曉做的時陣，我就希望講有愈濟人來學這个物件。
Guá ka-kī leh o̍h tsuá–tiau ê sî-tsūn, lóng bô-lâng leh kà, tán guá ē-hiáu tsò ê sî-tsūn, guá tō hi-bāng kóng ū jú-tsē lâng lâi o̍h tsit-ê mi̍h-kiānn.

吳靜芳講：「愛踏--入-來，才會當體會紙雕帶--來的驚喜佮快樂」，就親像伊佇無意中發現一个新手路。
Ngôo Tsīng-hong kóng：“Ài ta̍h--ji̍p-lâi, tsiah ē-tàng thé-huē tsuá-tiau tuà--lâi ê kiann-hí kap khuài-lo̍k.”,tō tshin-tshiūnn i tī bô-ì-tiong huat-hiān tsi̍t-ê sin tshiú-lōo.

三D佮二D內底，其實有存在一个視覺叫做2.5D。
Sann D kap jī D lāi-té, kî-si̍t有tsûn-tsāi tsi̍t-ê sī-kak kiò-tsò jī-tiám-gōo D.

當物件變做按呢層次的組合的時陣，會感覺充滿視覺上的驚喜，這全世界猶無人按呢做。
Tng mi̍h-kiānn piàn-tsò án-ne tsân-tshù ê tsoo-ha̍p ê sî-tsūn, ē kám-kak tshiong-muá sī-kak siōng ê kiann-hí, tse tsuân sè-kài iáu bô-lâng án-ne tsò.

每一幅作品，攏記錄吳靜芳的信念佮執訣，伊的創作，對講究手路，到內心世界的展現，綴情感的深化，回歸自然，揣著屬佇伊家己的紙雕世界。
Muí tsi̍t-pak tsok-phín lóng kì-lo̍k Ngôo Tsīng-hong ê sìn-liām kap tsip-kuat, i ê tshòng-tsok, tuì káng-kiù tshiú-lōo, kàu lāi-sim sè-kài ê tián-hiān, tuè tsîng-kám ê tshim-huà, huê-kui tsū-jiân, tshuē-tio̍h sio̍k-tī i ka-kī ê tsuá-tiau sè-kài.

余榮宗 嘉義報導