2012年6月19日 星期二

看世事講台語:細空毋補 大空叫苦


PNNPTS 於 2011-05-08 上傳
※ 本單元是公共電視及李江却台語文教基金會合作製作。歡迎大家 link 做非營利教學使用。

標題:國小教多元情慾 家長質疑過頭早
Kok-sió kà to-guân tsîng-io̍k, ka-tiúnn tsit-gî kuè-thâu tsá

教育部欲辦公聽會 收集意見才做調整
Kàu-io̍k-pōo beh pān kong-thiann-huē, siu-tsi̍p ì-kiàn tsiah tsò tiâu-tsíng

諺語:細空毋補,大空叫苦
Sè khang m̄ póo, tuā khang kiò khóo.



內文:

教育部規劃對今年一百學年度開始
Kàu-io̍k-pōo kui-uē tuì kin-nî tsi̍t-pah ha̍k-nî-tōo khai-sí

佇小學佮國中的性別平等教育內底
tī sió-ha̍k kap kok-tiong ê sìng-pia̍t kàu-io̍k lāi-té

來加入「同志」(同性戀)的議題
lâi ka-ji̍p tông-tsì(tông-sìng-luân)ê gī-tê

不過家長佮社會團體提出
put-kò ka-tiúnn kap siā-huē-thuân-thé the̍h-tshut

教育部拄仔編好的教師手冊
Kàu-io̍k-pōo tú-á pian hó ê kàu-su tshiú-tsheh

來質疑國校時期就來教這
lâi tsit-gî kok-hāu sî-kî tō lâi kà tse

是毋是siunn早一點仔
sī-m̄-sī siunn tsá--tsi̍t-tiám-á

*林曉儀總會長 台北市國小家長聯合會
按呢的課程納入國校階段
Án-ne ê khò-thîng la̍p-ji̍p kok-hāu kai-tuānn

遮的小學生in的身心發展
tsia-ê sió-ha̍k-sing in ê sin-sim huat-tián

攏猶咧建立
lóng iáu leh kiàn-li̍p

其實(教這)是過頭早啊
kî-si̍t (kà tse) sī kuè-thâu tsá--ah

*齊明 台灣真愛聯盟發言人
遮的小學生佮國中生
Tsia-ê sió-ha̍k-sing kap kok-tiong-sing

根本對伊家己的性傾向
kin-pún tuì i ka-kī ê sìng-khing-hiòng

無可能有所謂的認知
bô khó-lîng ū sóo-uī ê jīn-ti

根據阮的瞭解
kun-kù guán ê liáu-kái

這款性傾向的認知
tsit khuán sìng-khing-hiòng ê jīn-ti

上少愛到二十幾歲(才會清楚)
siōng-tsió ài kàu jī-tsa̍p kuí huè(tsiah ē tshing-tshó)

嘛有教師代表不止仔質疑
Mā ū kàu-su tāi-piáu put-tsí-á tsit-gî

煩惱講未來是欲按怎教咧
huân-ló kóng bī-lâi sī beh án-tsuánn kà--leh?

*張文昌理事長 台北市教師會
當一个老師
Tng tsi̍t ê lāu-su

阮知影教這款物件
guán tsai-iánn kà tsit khuán mi̍h-kiānn

會引起家長誠爭議的時陣
ē ín-khí ka-tiúnn tsiânn tsing-gī ê sî-tsūn

阮足想欲請教教育部
guán tsiok siūnn-beh tshíng-kàu Kàu-io̍k-pōo

按呢到底欲按怎教
án-ne tàu-té beh án-tsuánn kà

阮到底欲教抑毋
guán tàu-té beh kà iah m̄?

面對各界質疑
Bīn-tuì kok-kài tsit-gî

教育部嘛強調
Kàu-io̍k-pōo mā kiông-tiāu

遮的課程攏有經過專家學者的審議
tsia-ê khò-thîng lóng ū king-kuè tsuan-ka ha̍k-tsiá ê sím-gī

嘛辦過幾若場的公聽會
mā pān kuè kuí-nā tiûnn ê kong-thiann-huē

就是希望會當教學生
tō-sī hi-bāng ē-tàng kà ha̍k-sing

來尊重無仝性向的人
lâi tsun-tiōng bô-kâng sìng-hiòng ê lâng

*柯今尉主任 教育部訓委會
我針對拄才彼段內容
Guá tsiam-tuì tú-tsiah hit tuānn luē-iông

講著安全性行為這部份
kóng tio̍h an-tsuân sìng-hîng-uî tsit pōo-hūn

我當然可能就袂去共同學提起
guá tong-jiân khó-lîng tō bē khì kā tông-o̍h thê-khí

但是對高中學生的部份
tān-sī tuì ko-tiong ha̍k-sing ê pōo-hūn

可能這部份就有必要啊
khó-lîng tsit pōo-hūn tō ū pit-iàu--ah

*朱鳳芝 立委
啊若有一寡脫箠的老師欲按怎
Ah nā ū tsi̍t-kuá thut-tshuê ê lāu-su beh án-tsuánn?

不過教育部嘛表示
Put-kò Kàu-io̍k-pōo mā piáu-sī

會佇咧九月開學進前
ē tī-leh káu--gue̍h khai-ha̍k tsìn-tsîng

佇各地辦說明會
tī kok-tē pān suat-bîng-huē

閣加做溝通
koh ke tsò koo-thong

予家長佮專家表達意見
hōo ka-tiúnn kap tsuan-ka piáu-ta̍t ì-kiàn

才閣針對相關的內容
tsiah koh tsiam-tuì siong-kuan ê luē-iông

來做調整
lâi tsò tiâu-tsíng

3 則留言:

  1. It is important for biology coursework writing service students to seek Biology Essay Writing Services from a reputable biology research paper service provider for their biology assignment writing services.

    回覆刪除
  2. Your blogs are great.Are you also searching for shadow health ? we are the best solution for you. We are best known for delivering shadow health assignments.

    回覆刪除
  3. This is quite a good blog.Are you also searching for DNP Capstone Project? we are the best solution for you. We are best known for delivering nursing writing services to students without having to break the bank.

    回覆刪除