2012年6月12日 星期二

看世事講台語:做猴著會peh樹


PNNPTS 於 2011-05-04 上傳
※ 本單元是公共電視及李江却台語文教基金會合作製作。歡迎大家 link 做非營利教學使用。

標題:高英工商鼓勵考照 扯勻1人15張
Ko-ing Kang-siong kóo-lē khó tsiàu tshé-ûn tsi̍t lâng tsa̍p-gōo tiunn
扯勻(tshé-ûn):平均

證照升學雙頭拚 欲揣頭路就較贏
Tsìng-tsiàu sing-ha̍k siang-thâu piànn beh tshuē thâu-lōo tō khah iânn

諺語:做猴著會peh樹。
Tsò kâu tio̍h ē peh tshiū.
華語:『人要有一技之長』,做猴上無愛學會曉peh樹,人嘛愛學一項專長,通好度活。

內文:

*蔡忠憲 高英工商教師

先拆光碟機
Sing thiah kong-tia̍p-ki.

佇課堂上實做
tī khò-tn̂g siōng si̍t-tsò

拆電腦動作伶俐
thiah tiān-náu tōng-tsok líng-lī.

這是高雄一間高職
Tse sī Ko-hiông tsi̍t king ko-tsit

實用技能學程班的學生仔
si̍t-iōng ki-lîng ha̍k-tîng-pan ê ha̍k-sing-á,

佇老師的指導下
tī lāu-su ê tsí-tō hā,

人人攏是考照的高手
lâng-lâng lóng sī khó-tsiàu ê ko-tshiú.

猶毋過一開始
Iáu m̄-koh tsi̍t-khái-sí,

同學in毋是遮爾自動自發的
tông-o̍h in m̄-sī tsiah-nī tsū-tōng-tsū-huat--ê.

*蔡忠憲 高英工商教師

到甲頂學期為止
Kàu kah tíng ha̍k-kî uî-tsí,

阮全班共總有748張
guán tsuân-pan kiōng-tsóng ū 748 tiunn.

總扯是隨人有15.2張(證照)
Tsóng-tshé sī suî-lâng ū 15.2 tiunn (tsìng-tsiàu).

In嘛開始建立自信
In mā khai-sí kiàn-li̍p tsū-sìn,

對這方面愈來愈有興趣
tuì tsit hong-bīn jú lâi jú ū hìng-tshù,

甚至會主動問老師講
sīm-tsì ē tsú-tōng mn̄g lāu-su kóng,

老師,阮猶有啥物證照通來去考
lāu-su guán iáu ū siánn-mih tsìng-tsiàu thang lâi-khì khó.

Kā一張一張的證照掀開
Kā tsi̍t tiunn tsi̍t tiunn ê tsìng-tsiàu hian--khui,

對高一到高三
tuì ko-it kàu ko-sann,

沈子程一路考落來
Sím Tsú-tîng tsi̍t-lōo khó--lo̍h-lâi,

目前已經有二十八張
bo̍k-tsîng í-king ū jī-tsa̍p peh tiunn

電腦方面的相關證照
tiān-náu hong-bīn ê siong-kuan tsìng-tsiàu.

國中基測才考一百二十外分
Kok-tiong ki-tshik tsiah khó tsi̍t-pah jī-tsa̍p guā hun,

原本對家己無啥物信心
guân-pún tuì ka-kī bô siánn-mih sìn-sim.

但是一改一改考照的經驗累積落來
Tān-sī tsi̍t kái tsi̍t kái khó-tsiàu ê king-giām luí-tsik--lo̍h-lâi,

予伊對未來的人生規劃閣較明確
hōo i tuì bī-lâi ê jîn-sing kui-i̍k koh-khah bîng-khak.

遮的努力的成果
Tsia-ê lóo-li̍k ê sîng-kó,

嘛順利予伊佇咧繁星計畫當中
mā sūn-lī hōo i tī leh Huân-sing kè-uē tong-tiong,

錄取台灣科技大學
lio̍k-tshú Tâi-uân Kho-ki Tāi-ha̍k.

*沈子程 實用技能學程班學員

一擺閣一擺累積
Tsi̍t pái koh tsi̍t pái luí-tsik,

逐擺挑戰攏比頂一擺閣較困難
ta̍k-pái thiau-tsiàn lóng pí tíng-tsi̍t pái koh-khah khùn-lân.

見若過一關了後就會感覺
Kìnn-nā kuè tsi̍t kuan liáu-āu tō ē kám-kak

窮實家己是有才調做甲到的
khîng-si̍t ka-kī sī ū-tsâi-tiāu tsò kah kàu--ê,

嘛會加較有信心
mā ē ke khah ū sìn-sim.

許凱竣同學
Khóo Khái-tsùn tông-o̍h,

國中的時陣
kok-tiong ê sî-tsūn,

閣對家己的未來茫茫渺渺
koh tuì ka-kī ê bī-lâi bông-bông-biáu-biáu

佇咧考著十六張的專業證照了後
tī leh khó-tio̍h tsa̍p-la̍k tiunn ê tsuan-gia̍p tsìng-tsiàu liáu-āu,

毋干焦予家己有一項專長
m̄ kan-tann hōo ka-kī ū tsi̍t hāng tsuan-tióng,

對升學之路嘛愈來愈有信心
tuì sing-ha̍k tsi lōo mā jú lâi jú ū sìn-sim.

考照的過程雖然辛苦
Khó-tsiàu ê kuè-tîng sui-jiân sin-khóo,

但是伊感覺真價值
tān-sī i kám-kak tsin kè-ta̍t.

*許凱竣 實用技能學程班學員

我家己有考十六張
Guá ka-kī ū khó tsa̍p-la̍k tiunn.

練習的過程有影真艱苦
Liān-si̍p ê kuè-tîng ū-iánn tsin kan-khóo,

毋過等到共遐的證照搦佇手裡的時
m̄-koh tán kàu kā hiah-ê tsìng-tsiàu la̍k tī tshiú--lí ê sî,

家己就會感覺
ka-kī tō ē kám-kak

閣來拍算有好的大學通好讀矣
koh lâi phah-sǹg ū hó ê tāi-ha̍k thang-hó tha̍k--ah.

老師表示
Lāu-su piáu-sī

協助學生仔來考取專業證照
hia̍p-tsōo ha̍k-sing-á lâi khó-tshú tsuan-gia̍p tsìng-tsiàu,

除了kā升學的機率提懸
tû-liâu kā sing-ha̍k ê ki-lu̍t thê-kuân,

目前的就業市場
bo̍k-tsîng ê tsiū-gia̍p tshī-tiûnn,

有愈濟專業證照
ū jú tsē tsuan-gia̍p tsìng-tsiàu,

相對就業的機會就愈大
siong-tuì tsiū-gia̍p ê ki-huē tō jú tuā.

沒有留言:

張貼留言