【技藝101】製。漆器

堅持天然漆 大甲師傅的漆器因緣

漆器是一項古早的老季數,在大甲就有一位漆藝家廖勝文,堅持用天然漆製做漆器, 也堅持在這行寂寞做下去, 技藝101來看他的故事。(2012-03-19中晝新聞)


編輯 / 余榮宗、黃能揚、李江却台語文教基金會 陳豐惠 劉承賢

漆已十人諫 加雕應若何 增華驚後世 信鮮挽回波 花映祥曦暖 葉承瑞露多 細針鐫永樂 誰與護而呵

踮佇大甲鐵砧山跤創作漆器的漆藝師廖勝文，當咧為伊的作品上漆。身為少數的漆藝傳人，伊講當年是無張持去學漆藝的，伊笑講，攏是因為共阿兄送貨的關係。

Tiàm tī Tāi-kah Thih-tiam-suann kha tshòng-tsok tshat-khì ê tshat-gē sai-hū Liāu Sìng-bûn, tng teh uī i ê tsok-phín tsiūnn tshat. Sin uî tsió-sòo ê tshat-gē thuân-jîn, i kóng tong-nî sī bô-tiunn-tî khì o̍h tshat-gē- -ê, i tshiò kóng, lóng sī in-uī kā a-hiann sàng huè ê kuan-hē.
彼个時陣佮大兄咧做醬菜，啊就愛送貨揹貨，筋肉拽著傷，啊去榮總看幾若遍，彼醫生講你敢無愛換一下仔工課，愛予伊歇睏伊才會好嘛。手工藝所咧辦陳火慶漆藝傳習這个計畫，十个學員內底是我已經結婚的矣，所以是尾矣才知影講，其實老師伊欲去選我的時陣，伊嘛足考慮。

Hit-ê sî-tsūn kap tuā-hiann teh tsò tsiùnn-tshài, ah tō ài sàng huè phāinn huè, kin-bah tsuāinn tio̍h-siong, ah khì Îng-tsóng khuànn kuí-nā piàn, he i-sing kóng lí kám bô ài uānn tsi̍t-ē-á khang-khuè, ài hōo hioh-khùn i tsiah ē hó–mah. Tshiú-kang-gē-sóo teh pān Tân Hué-khìng tshat-gē thuân-si̍p tsit-ê kè-uē, tsa̍p ê ha̍k-uân lāi-té sī guá í-king kiat-hun- -ê-ah, sóo-í sī bué- -ah tsiah tsai-iánn kóng, kî-si̍t lāu-su i beh suán- -guá ê sî-tsūn, i mā tsiok khó-lū.

因為無回頭路，予伊這个濟歲的學生，干焦會當佇漆藝頂懸拍拚創作，致心研究「脫胎」技法，無想著逐年攏著獎，變做台灣少數的漆藝達人。

In-uī bô huê-thâu-lōo, hōo i tsit-ê tsē-huè ê ha̍k-sing, kan-tann ē-tàng tī tshat-gē tíng-kuân phah-piànn tshòng-tsok, tì-sim gián-kiù “thuat-thai” ki-huat, bô-siūnn-tio̍h ta̍k-nî lóng tio̍h-tsióng, piàn-tsò Tâi-uân tsió-sòo ê tshat-gē ta̍t-jîn.

生漆這个原料佮這馬現代的塗料其實是無仝的，時間過程變數，其實攏是較無法度掌握的，啊這个材質，伊耐酸耐鹹，伊會當下咧千年。

Tshenn-tshat tsit-ê guân-liāu kap tsit-má hiān-tāi ê tôo-liāu kî-si̍t sī bô-kâng- -ê, sî-kan, kuè-tîng, piàn-sòo, kî-si̍t sī khah bô-huat-tōo tsiáng-ak- -ê, ah tsit-ê tsâi-tsit, i nāi-sng nāi-kiâm, i ē-tàng hē leh tshing-nî.

漆器歷史四千外年，對裝thānn的項物到日常用品，攏會當看著in的路用，啊毋過這馬，因為厚工，煞無符合經濟價值，技藝嘛沓沓仔流去，為著欲延續這項工藝，廖勝文定定咧思考欲按怎共改變。

Tshat-khì li̍k-sú sì-tshing guā nî, tuì tsng-thānn ê hāng-mi̍h kàu ji̍t-siông iōng-phín, lóng ē-tàng khuànn-tio̍h in ê lōo-īng, ah m̄-koh tsit-má, in-uī kāu-kang, suah bô hû-ha̍p king-tsè kè-ta̍t, ki-gē mā ta̍uh-ta̍uh-á lâu- -khì, uī-tio̍h beh iân-sio̍k tsit hāng kang-gē, Liâu Sìng-bûn tiānn-tiānn teh su-khó beh án-tsuánn kā kái-piàn.

這幾年咧揣的，猶是希望講，伊會當去融合入來這馬現代人的生活內底，家飾啦hoonnh，抑是講佇彼號裝潢方面。

Tsit kuí nî teh tshuē- -ê, iá sī hi-bāng kóng, i ē-tàng khì iông-ha̍p ji̍p-lâi tsit-má hiān-tāi-lâng ê sing-ua̍h lāi-té, ka-sik- -lah-hoonnh, ia̍h-sī kóng tī hit-lō tsong-hông hong-bīn.

一路行來，廖勝文感謝當初牽成伊的老師，嘛感謝厝內人的支持，以後的工藝路，伊干焦想欲照按呢堅持落去，佇漆藝留下貢獻。

Tsi̍t-lōo kiânn- -lâi, Liāu Sìng-bûn kám-siā tong-tshoo khan-sîng i ê lāu-su, mā kám-siā tshù-lâi-lâng ê tsi-tshî, í-āu ê kang-gē-lōo, i kan-tann siūnn-beh tsiàu án-ne kian-tshî- -lo̍h-khì, tī tshat-gē lâu-hā kòng-hiàn. Kì-tsiá Î Îng-tsong pò-tō.

記者 余榮宗 台中報導