子婿燈高懸廳堂 94歲老師傅傑作
年關將近，也是結婚旺季，佇金門的新人要結婚，迎娶隊伍前總有一對子婿燈作為前引導，象徵添丁發財，寫上堂號的子婿燈，掛在廳堂之上，也有慎終追遠的寓意。這項傳統的閩南結婚禮器，會做的師傅已經不多，目前在金門還有一位高齡94歲的師傅與他兒子還在製作，完全手工的技法，也讓很多鄉親慕名前來，來看看這項金門的傳統文化。
以早就有這个傳統ê風俗，結婚一定掛一對燈
Í-tsá tō ū tsit-ê thuân-thóng ê hong-sio̍k, kiat-hun it-tīng kuà tsi̍t tuì ting.
圖，阮一定照古法，愛自然予焦
Tôo, gún it-tīng tsiàu kóo-huat, ài tsū-jiân hōo ta.
娶嫁ê一陣人上頭前，囡仔捾ê一對鼓仔燈，這是金門傳統結婚ê例內底袂使無ê禮器「囝婿燈」。蹛佇古崗ê董天補老師傅，少年ê時捌讀幾若冬私學仔，是機會拄tshiāng開始做鼓仔燈--ê
Tshuā-kè ê tsi̍t-tīn-lâng siōng-thâu-tsîng, gín-á kuānn ê tsi̍t tuì kóo-á-ting, tse sī Kim-mn̂g thuân-thóng kiat-hun ê lē lāi-té bē-sái bô ê lé-khì ‘kiánn-sài-ting’. Tuà tī Khóo-khinn ê Táng Thian-póo lāu-sai-hū, siàu-liân ê sî bat tha̍k kuí-nā-tang su-o̍h-á, sī ki-huē tú-tshiāng khai-sí tsò kóo-á-ting--ê.
註解：
娶嫁：華語『迎親』
機會拄tshiāng：華語『因緣際會』
厝邊有人欲結婚，啊無囝婿燈，規个燈提--來啊，啊我kā紲按呢kā描，畫畫咧，啊創hōo--伊
Tshù-pinn ū lâng beh kiat-hun, ah bô kiánn-sài-ting, kui-ê ting the̍h--lâi ah, ah guá kā suà án-ne kā biô, uē-uē leh, ah tshòng hōo--i.
閩南式ê「囝婿燈」，正面寫字姓，另外hit面寫堂號，用光豔ê色水畫蓮花、牡丹，掛佇大廳頂懸，象徵添丁（燈）發財，昌盛發展，董天補講，作品得著認同，攏是一點一注慢慢仔累積來--ê
Bân-lâm-sik ê ‘kiánn-sài-ting’, tsiànn-bīn siá jī-sènn, līng-guā hit-bīn siá tn̂g-hō, īng kng-iām ê sik-tsuí uē liân-hue, bóo-tan, kuà tī tuā-thiann tíng-kuân, siōng-ting thiam-ting huat-tsâi, tshiong-sīng huat-tián, Táng Thian-póo kóng, tsok-phín tit-tio̍h jīn-tông, lóng sī tsi̍t-tiám-tsi̍t-tù luí-tsik--lâi-ê.
常做手就熟 人客就是咱ê師傅，伊會講，像這你有較紅豔較媠。喜事愛紅、愛圓
Siông tsò tshiú tō si̍k. Lâng-kheh tō sī lán ê sai-hū, i ē kóng, tshiūnn tse lí ū khah âng-iām khah suí. Hí-sū ài âng, ài înn.
上好ê時陣啊，一年會當銷280對，啊這陣無啦，啊閣兩个人咧做咧
Siōng-hó ê sî-tsūn ah, tsi̍t nî ē-tàng siau nn̄g-pah peh-tsa̍p tuì, ah tsit-tsūn bô lah, ah koh nn̄g ê lâng teh tsò leh.
這馬是講金門honnh，有這號民俗ê舊厝重翻，顛倒佇新厝hit號結婚有ê啊，做2.3對喔
Tsit-má sī kóng Kim-mn̂g honnh, ū tsit-hō bîn-sio̍k ê kū-tshù tîng-huan, tian-tò tī sin-tshù hit-hō kiat-hun ū ê ah, tsò nn̄g sann tuì oo.
後生董騰祥退休了後，毋甘老爸ê工夫無人學，毋甘故鄉ê技藝自按呢無--去，所以kā老爸鬥相共，滿足鄉親ê需要
Hāu-sinn Táng Thîng-siông thè-hiu liáu-āu, m̄-kam lāu-pē ê kang-hu bô lâng o̍h, m̄-kam kòo-hiong ê ki-gē tsū-án-ne bô--khì, sóo-í kā lāu-pē tàu-sann-kāng, buán-tsiok hiong-tshin ê su-iàu.
進前就已經有攢這--ah honnh，就是講繼續kā傳--落-去，阮老爸honnh，攏已經做甲按呢，無閣繼續做--lueh拍損
Tsìn-tsîng tō í-king ū tshuân tse--ah honnh, tō sī kóng kè-sio̍k kā thuân--lo̍h-khì, gún lāu-pē honnh, lóng í-king tsò kah án-ne, bô koh kè-sio̍k tsò--lueh phah-sńg.
較少，嘛有ê結婚無看著囝婿燈，這就是講傳統ê舊風俗
Khah tsió, mā ū ê kiat-hun bô khuànn-tio̍h kiánn-sài-ting, tse tō sī kóng thuân-thóng ê kū-hong-sio̍k.
傳統閩南色彩ê「囝婿燈」，tann kan-tann金門猶看會著，94歲ê董天補，為著無愛予大廳ê鼓仔燈無--去，猶原佇客廳ê角仔，恬恬仔維持這項傳統
Thuân-thóng bân-lâm sik-tshái ê ‘kiánn-sài-ting’, tann kan-tann Kim-mn̂g iáu khuànn-ē-tio̍h, káu-tsa̍p sì huè ê Táng Thian-póo, uī-tio̍h bô ài hōo tuā-thiann ê kóo-á-ting bô--khì, iû-guân tī kheh-thiann ê kak-á, tiām-tiām-á î-tshî tsit-hāng thuân-thóng.
記者 余榮宗 金門報導
Kì-tsiá Î Îng-tsong Kim-mn̂g pò-tō.
沒有留言:
張貼留言