【技藝101】宋江盾

明輝師做宋江盾 一甲子功力口碑好

在南部廟會活動相當盛行的宋江陣，對陣操演相當精彩，隊員手中拿的武器更是講究，其中的盾牌有竹製，藤製及皮製，要如何能做出好用又耐久的盾牌，就要靠製盾師傅的經驗，在台南關廟的明輝師，就是做了60多年的盾牌師傅，一身好功夫也讓顧客捨不得讓他退休，來看看他做的盾牌。

篾仔著愛硬tsiānn，愛會堪得摃
Bi̍h-á tio̍h-ài ngē-tsiānn, ài ē kham-tit kòng.

會曉做篾器ê hit種老人攏曲--去-ah
Ē-hiáu tsò bi̍h-khì ê hit-tsióng lāu-lâng lóng khiau--khì -ah.

佇咧南部地區迎鬧熱定看著宋江陣，手--裡弄ê刀仔棍仔、陣勢變化真精彩刺激，其中防守ê武器「宋江盾」，大部份攏是關廟ê「明輝師」做--ê
Tī leh lâm-pōo tē-khu ngiâ-nāu-jia̍t tiānn khuànn-tio̍h Sòng-kang-tīn, tshiú--lí lāng ê to-á kùn-á, tīn-sè piàn-huà tsin tsing-tshái tshì-kik, kî-tiong hông-siú ê bú-khì ‘sòng-kang-tún, tuā-pōo-hūn lóng sī Kuan-biō ê Bîng-hui-sai tsò--ê.

關廟啦ê規庄攏是咧做篾器--啊，竹器攏足有銷，足有行--ê，啊我是做足濟項--ê，所以賰這項才會無斷按呢niâ
Kuan-biō lah ê kui-tsng lóng sī teh tsò bi̍h-khì--ah, tik-khì lóng tsiok ū-siau, tsiok ū-hâng--ê, ah guá sī tsò tsiok tsē hāng--ê, sóo-í tshun tsit-hāng khah ē bô tn̄g án-ne niâ.

較早關廟hit-tah做足濟竹仔、藤仔ê物件，翁明輝細漢就綴老爸學，雖然市場沓沓仔無--去，廟會宋江陣ê需求煞有加無減，自按呢翁明輝專心做宋江盾，另外設計出竹牌佮牛皮牌
Khah-tsá Kuan-biō hit-tah tsò tsiok tsē tik-á, tîn-á ê mi̍h-kiānn, Ang Bîng-hui sè-hàn tō tuè lāu-pē o̍h, sui-jiân tshī-tiûnn ta̍uh-ta̍uh-á bô--khì, biō-huē Sòng-kang-tīn ê su-kiû suah ū-ke bô-kiám, tsū-án-ne Ang Bîng-hui tsuan-sim tsò Sòng-kang-tún, līng-guā siat-kè tshut tik-pâi kap gû-phuê-pâi.

對竹仔愛有研究ê人才會好學，啊若無，你若欲講干焦破篾仔，啊才來做這無好學 無專業ê人honnh，做--起-來袂好看--啊，閣無hiah-nī耐用
Tuì tik-á ài ū gián-kiù ê lâng khah ē hó o̍h, ah nā bô, lí nā beh kóng kan-tann phuà bi̍h-á, ah khah lâi tsò tse bô hó o̍h. Bô tsuan-gia̍p ê lâng honnh, tsò--khí-lâi bē hó-khuànn--ah, koh bô hiah-nī nāi-iōng.

外國是咧攑看媠--ê，啊咱台灣是咧做武器li，真正佇咧操--ê
Guā-kok sī teh gia̍h khuànn-suí--ê, ah lán Tâi-uân sī teh tsò bú-khì li, tsin-tsiànn tī leh tshau--ê.

成品

做這著長時間跍咧，對八十外歲ê翁明輝來講，有影真食力，嘛捌想講莫做，總--是老客戶ê姑情拜託，予伊放袂落
Tsò tse tio̍h tn̂g sî-kan ku leh, tuì peh-tsa̍p-guā huè ê Ang Bîng-hui lâi kóng, ū-iánn tsin tsia̍h-la̍t, mā bat siūnn kóng mài tsò, tsóng--sī lāu-kheh-hōo ê koo-tsiânn pài-thok, hōo i pàng bē lo̍h.

114802攏會講拜託咧啦，毋通歇啦，啊來，來到地攏嘛是tsia-ê好朋友，來，來到地--ah就講你會食百幾歲啦
Lóng ē kóng pài-thok leh lah, m̄-thang hioh lah, ah lâi, lâi kàu tè lóng mā sī tsia-ê hó pîng-iú, lâi, lâi kàu tè--ah tō kóng lí ē tsia̍h pah-kuí huè lah.

我去神明hia攏kā你講你愛保庇，保庇你會食足久--ê，攏有hit號毋甘啦
Guá khì sîn-bîng hia lóng kā lí kóng lí ài pó-pì, pó-pì lí ē tsia̍h tsiok kú--ê, lóng ū hit-hō m̄-kam lah.

就是這份感動，予明輝師繼續身軀痀痀，恬恬咧維持這項傳統技藝，雖然喙--裡講袂煩惱技藝失傳，毋過講ê時煞小可仔有老師傅ê失落感
Tō sī tsit-hūn kám-tōng, hōo Bîng-hui-sai kè-sio̍k sin-khu ku-ku, tiām-tiām teh î-tshî tsit-hāng thuân-thóng ki-gē, sui-jiân tshuì--lí kóng bē huân-ló ki-gē sit-thuân, m̄-koh kóng ê sî suah sió-khuá-á ū lāu-sai-hū ê sit-lo̍h-kám.

袂啦！年歲到tsia來袂煩惱--ah 114930做是都會做，啊無，你嘛無工課，咱年歲有--ah，較無咧hit-lō... 114722可能會消失--去
Bē lah! Nî-huè kàu tsia lâi bē huân-ló--ah. Tsò sī to ē tsò, ah bô, lí mā bô khang-khuè, lán nî-huè ū--ah, khah bô leh hit-lō... Khó-lîng ē siau-sit--khì.

記者 余榮宗 台南報導
Kì-tsiá Î Îng-tsong Tâi-lâm pò-tō.