【技藝101】梅仔花

新北市鶯歌區，有台灣"景德鎮"的名號，早期遮出產的"梅仔花"碗盤，因為圖案佮色水很好看，在古早時代，很受歡迎，常常還沒開燒，就有盤商排隊搶了了，佇沒落好幾十年之後，現在有在地廠商重新生產。

干焦鶯歌這搭遮才有梅仔花。
Kan-na Ing-ko tsit-tah-tsia tsiah ū Muî-á-hue.

本身厝內咧做這，若無做，可能這个產業有影會愈來愈落坐。
Pún-sin tshù-lāi leh tsò tse, nā bô tsò, khó-lîng tsit-ê sán-gia̍p ū-iánn ē jú-lâi-jú lo̍h-tshē.

行入鶯歌瓷仔老街，目睭前攏是優秀巧路（khiáu-lōo）的瓷仔藝品，毋過若講著會通代表鶯歌特色的，是這个看著誠平凡的碗盤「梅仔花」，閣號做「胭脂紅」。
Kiânn-ji̍p Ing-ko huî-á lāu ke, ba̍k-tsiu tsîng lóng-sī iù-siù khiáu-lōo ê huî-á gē-phín, m̄-koh nā kóng tio̍h ē-thang tāi-piáu Ing-ko ti̍k-sik--ê, sī tsit-ê khuànn-tio̍h tsiânn pîng-huân ê uánn-puânn “Muî-á-hue”, koh hō-tsò “Ian-tsi-âng”.

這梅仔花在四十幾年前佇咱鶯歌是上好市的物件，因為在這梅仔花之前，咱的瓷仔較無遐媠。
Tse Muî-á-hue tsāi sì-tsa̍p kuí nî tsîng tī lán Ing-ko sī siōng hó-tshī ê mi̍h-kiānn, in-uī tsāi tse Muî-á-hue tsi-tsîng, lán ê huî-á khah bô hiah suí.

「梅仔花」的出現，聽講是一位姓周的淋碭（lâm-thn̄g）師傅，無意中調出來的釉彩，入窯燒了後親像少女的朱唇（tsu-tûn）胭脂，樸實的美感，佇1950年代，時行全台灣，製作（tsok）「梅仔花」起家的黃世昌，就經歷過當時的盛況。

猶未出窯，人就有提定金來。
Iáu-buē tshut iô, lâng tō ū the̍h tiānn-kim lâi.

中盤就一直抾一直抾，一直用入去啊。足緊，橫直你一窯出來，連鞭仔就完矣。
Tiong-puânn tō it-ti̍t khioh it-ti̍t khioh, it-ti̍t iōng--ji̍p-khì ah. Tsiok kín, huâinn-ti̍t lí tsi̍t iô tshut--lâi, liam-mi-á tō uân--ah.

步驟

這是瓷碭嘛，咱是淋碭了才落去畫。
Tse sī huî-thn̄g--mā, lán sī lâm-thn̄g liáu tsiah lo̍h-khì uē.

畫起來是白白，但是伊若燒起來就變粉紅仔色矣， 摸起來膨膨，這就是「梅仔花」的特色。
Uē--khí-lâi sī pe̍h-pe̍h, tān-sī i nā sio--khí-lâi tō piàn hún-âng-á sik--ah, bong--khí-lâi phòng-phòng, tse tō-sī Muî-á-hue ê ti̍k-sik.

成品

像這是鶯歌傳統的。
Tshiūnn tse sī Ing-ko thuân-thóng--ê.

人客感覺講按呢，食起來了後，加一个視覺上的享受。
Lâng-kheh kám-kak kóng án-ne, tsia̍h--khí-lâi liáu-āu, ke tsi̍t-ê sī-kak siōng ê hiáng-siū.

熟似的古早味，嘛是鶯歌人的記持，毋過綴市場對內銷轉外銷，瓷仔廠嘛沓沓仔改做其他的產品，這嘛予「梅仔花」的媠，慢慢仔退出市場。
Si̍k-sāi ê kóo-tsá bī, mā-sī Ing-ko lâng ê kì-tî, m̄-koh tuè tshī-tiûnn tuì lāi-siau tsuán guā-siau, huî-á tshiúnn mā ta̍uh-ta̍uh-á kái tsò kî-tha ê sán-phín, tse mā hōo Muî-á-hue ê suí, bān-bān-á thè-tshut tshī-tiûnn.

黃威傑
綴時代一直咧改變，這傳統的物件就一直落坐，希望透過我這微細的力量，會當保留這个鶯歌原始的氣味。
Tuè sî-tāi it-ti̍t leh kái-piàn, tse thuân-thóng ê mi̍h-kiānn tō it-ti̍t lo̍h-tshē, hi-bāng thàu-kuè guá tse bî-sè ê li̍k-liōng, ē-tàng pó-liû tsit-ê Ing-ko guân-sú ê khì-bī.

佳哉經過黃--家爸仔囝的拍拚，予斷三十幾年的「梅仔花」重現生機。一撮胭脂分訴（hun-sòo）以早的風華，妖嬌野媠的花蕊，若像咧宣告屬佇鶯歌的色彩閣一擺盛開。
Ka-tsài king-kuè N̂gka pē-á-kiánn ê phah-piànn, hōo tn̄g sann-tsa̍p kuí nî ê Muî-á-hue tiông-hiān sing-ki. Tsi̍t-tshok ian-tsi hun-sòo í-tsá ê hong-huâ, iau-kiau iá-suí ê hue-luí, ná-tshiūnn leh suan-kò sio̍k-tī Ing-ko ê sik-tshái koh tsi̍t-pái sīng-khui.

猶閣活的時陣我當然會閣繼續落去用。毋才會知影講鶯歌往擺「梅仔花」是遮呢仔媠按呢，伊是代表咱鶯歌的物件。
Iáu-koh ua̍h ê sî-tsūn guá tong-jiân ē koh kè-siok lo̍h-khì iōng. M̄-tsiah ē tsai-iánn kóng Ing-ko íng-pái Muî-á-hue sī tsiah-nī-á suí án-ne, i sī tāi-piáu lán Ing-ko ê mi̍h-kiānn.

余榮宗 新北市報導