【技藝101】拗。紙

摺紙領域50餘年 賴禎祥技術創新

因為細漢時，佇路个撿到一隻紙摺小鳥，深深乎伊千變萬化吸引，就此進入去摺紙世界50幾冬，賴禎祥在紙世界裡面，靠著家己摸索，從來毋捌受過科班訓練，煞佇摺紙的个世界，樹立起標竿，這má更加跨界利用不鏽鋼質材，運用摺紙个技法，創作出一件一件，乎人真阿咾
个作品。
摺紙可以靜心身，方寸極限手腦耕，縱橫妙用技巧增，積時領悟智慧深
Tsih-tsuá khó-í tsīng sim-sing, hong-tsùn ki̍k-hān siú-ló king, tshiòng-hîng biāu-iōng ki-khá tsing, tsik sî líng-gōo tì-huī tshim.

12歲ê時湊拄歁用紙拗做鳥仔，因為好玄，一直拆--開閣拗倒轉--去，方寸之中ê世界曠闊，深深吸引賴禎祥，自按呢開始伊58冬久拗紙ê人生
Tsa̍p-jī huè ê sî tshàu-tú-khám īng tsuá áu tsò tsiáu-á, in-uī hònn-hiân, it-ti̍t thiah--khui koh áu tò tńg--khì, hong-tshùn tsi-tiong ê sè-kài khòng-khuah, tshim-tshim khip-ín Luā Tsing-siông, tsū-án-ne khai-sí i gōo-tsa̍p peh tang kú áu-tsuá ê jîn-sing.


 Kā拆開，研究，閣拗倒轉--去，啊拗袂好勢嘛是閣請教老前輩啊，啊想講這四角紙哪會tsiah厲害，honnh，一張四角紙會使千幾種ê變化
Kā thiah-khui, gián-kiù, koh áu tò tńg--khì, ah áu bē-hó mā sī koh tshíng-kàu láu-tsiân-puè--ah，ah siūnn-kóng tse sì-kak-tsuá ná ē tsiah lī-hāi, honnh, tsi̍t tiunn sì-kak-tsuá ē-sái tshing kuí tsióng ê piàn-huà.

賴禎祥運用數學ê根號佮原理，加上對哲學、宗教hām未來ê詮釋（tshuan-sik），予一般四常ê紙，變做充滿性命力ê創作，伊koh體會著拗紙就ná行棋，著愛斟酌考慮，起手無回
Luā Tsing-siông ūn-iōng sòo-ha̍k ê kin-hō kap guân-lí, ka-siōng tuì tiat-ha̍k, tsong-kàu bī-lâi ê tshuan-sik, hōo it-puann sù-siông ê tsuá, piàn-tsò tshiong-buán sènn-miā-li̍k ê tshòng-tsok, i koh thé-huē-tio̍h áu-tsuá tō ná kiânn-kî, tio̍h-ài tsim-tsiok khó-lū, khí-tshiú bû-huê.

註解：
根號：詞源是和製漢語「根号 (こんごう)」，華語kā日語借詞，咱嘛thang借。

袂使閣拗第二痕啦 152230你第二痕ê時陣niâ honnh，會影響伊第三第四，頭仔你差0.1公分，著--無，啊你拗甲尾--à彼个作品變0.5公分
Bē-sái koh áu tē-jī hûn--lah. Lí tē-jī hûn ê sî-tsūn niâ honnh, ē íng-hióng i tē-sann tē-sì, thâu-á lí tsha khòng-tiám it kong-hun, tio̍h--bô, ah lí áu kah bué--à hit-ê tsok-phín piàn khòng-tiám gōo kong-hun.

耐心、點陳、綿精閣有囡仔tioh，啊若無彼个囡仔tioh honnh，傷過嚴肅攏做嚴肅ê物件就無好耍--ah。
Nāi-sim, tiám-tîn, mî-tsinn koh ū gín-á-tioh, ah nā bô hit-ê gín-á-tioh honnh, siunn-kuè giâm-siok lóng tsò giâm-siok ê mi̍h-kiānn tō bô hó-sńg--ah.

註解：
點陳：用心注意。
綿精：真熱心做。


進前有人講欲kā我買啊，一尾龍，啊頭閣會tòm喔，honnh，伊講，啊這愛偌濟，我講2000，傷貴啦，我講彼愛拗幾若禮拜呢啊就規氣莫賣--ah
Tsìn-tsîng ū lâng kóng beh kā guá bé--ah, tsi̍t bué liông, ah thâu koh ē tòm--ooh, honnh, i kóng, ah tse ài juā-tsē, guá kóng nn̄g tshing, siunn kuì--lah, guá kóng he ài áu kuí-nā lé-pài--neh. Ah tō kui-khì mài bē--ah.

因為對藝術價值ê認知精差，賴禎祥決定作品無賣--人，干焦hông收藏，這幾冬伊嘛將技法用佇別項材料頂懸，踮無仝領域ê試驗，予伊ê生活過著真充實、快樂
In-uī tuì gē-su̍t kè-ta̍t ê jīn-ti tsing-tsha, Luā Tsing-siông kuat-tīng tsok-phín bô bē--lâng, kan-tann hông siu-tsông, tsit kuí tang i mā tsiong ki-huat īng tī pa̍t-hāng tsâi-liāu tíng-kuân, tiàm bô-kâng líng-hi̍k ê tshì-giām, hōo i ê sing-ua̍h kuè-tio̍h tsin tshiong-si̍t, khuài-lo̍k.

註解：
精差（tsing-tsha）：差異。

Tsia-ê陪我甲tann已經七十歲--ah，我袂講無聊，所以阮逐工都真快樂
Tsia-ê puê guá kah tann í-king tshit-tsa̍p huè--ah, guá bē kóng bô-liâu, sóo-í guán ta̍k-kang to tsin khuài-lo̍k.

伊講:「拗紙就親像種樹仔，成長ê過程充滿未知數，所以隨時會有新ê趣味」 賴禎祥就是有這款囡仔tioh，才會當佇拗紙ê世界--裡行遊
I kóng: “Áu-tsuá tō tsin-tshiūnn tsìng tshiū-á, sîng-tióng ê kuè-tîng tshiong-buán bī-ti-sòo, sóo-í suî-sî ē ū sin ê tshù-bī.” Luā Tsing-siông tō sī ū tsit-khuán gín-á-tioh, tsiah ē-tàng tī áu-tsuá ê sè-kài--lí kiânn-iû.

註解：
囡仔tioh：華語『像孩子一樣、天真無邪、天真爛漫』
行遊：華語『遊歷』

記者 余榮宗 台中報導
Kì-tsiá Î Îng-tsong Tâi-tiong pò-tō.