PNNPTS 於 2011-04-19 上傳
※ 本單元是公共電視及李江却台語文教基金會合作製作。歡迎大家 link 做非營利教學使用。
新聞標題：買票參選過戶碇 補助提去毋免還
Bé-phiò tsham-suán kuè hōo-tīng, póo-tsōo the̍h--khì m̄-bián hîng
江宜樺：欲召集學者政黨研修選罷法
Kang Gî-huâ：Beh tiàu-tsi̍p ha̍k-tsiá tsìng-tóng gián-siu suán-pā-huat
諺語：選舉無師傅，用錢買就有
Suán-kí bô sai-hū, īng tsîⁿ bé tō ū.
講著「賄選」（hué-suán）、「買票」，就予人想著流傳民間的這句話，這雖罔無算古早就有的諺語，m̄-koh真濟人知影這句話，咱就知數十年來的選舉文化佇人民心¬內是啥物「特色」--ah！
內文：
根據這馬的選罷法
Kin-kì tsit-má ê Suán-pā-huat
選舉參選者若得票超過戶碇
suán-kí tsham-suán-tsiá nā tit-phiò tshiau-kuè hōo-tīng
依法就會當領補助款
i-huat tō ē-tàng niá póo-tsōo-khuánn
一票三十箍
tsi̍t phiò sann-tsa̍p khoo
原本這是欲鼓勵民眾
guân-pún tse sī beh kóo-lē bîn-tsiòng
加參與選舉的制度設計
ke tsham-ú suán-kí ê tsè-tōo siat-kè
猶毋過煞因為法令無夠周全
iáu-m̄-koh suah in-uī huat-līng bô-kàu tsiu-tsuân
當選了後
tòng-suán liáu-āu
若閣予人判當選無效
nā koh hōo lâng phuànn tòng-suán bô-hāu
已經領去的選舉補助款嘛免交倒轉去
í-king niá--khì ê suán-kí póo-tsōo-khuánn mā bián kau tò-tńg--khì
內政部長江宜樺就講
Luē-tsìng-pōo-tiúnn Kang Gî-huâ tō kóng
伊嘛無法度接受
i mā bô-huat-tōo tsiap-siū
*江宜樺 內政部長
特別是因為買票致使當選無效的人
Ti̍k-pia̍t sī in-uī bé-phiò tì-sú tòng-suán bô-hāu ê lâng
煞猶會當領選舉經費補助
suah iáu ē-tàng niá suán-kí king-huì póo-tsōo
一票三十箍
tsi̍t phiò sann-tsa̍p khoo
我想阮是無啥會當接受
guá siūnn guán sī bô-siánn ē-tàng tsiap-siū
江宜樺嘛表示已經要求內政部
Kang Gî-huâ mā piáu-sī í-king iau-kiû Luē-tsìng-pōo
收集國內外的相關資料
siu-tsi̍p kok-lāi-guā ê siong-kuan tsu-liāu
了解國外敢有因為當選無效
liáu-kái kok-guā kám ū in-uī tòng-suán bô-hāu
共選舉補助款討轉來的案例
kā suán-kí póo-tsōo-khuánn thó--tńg-lâi ê àn-lē
嘛會召集國內學者參政黨的代表
mā ē tiàu-tsi̍p kok-lāi ha̍k-tsiá tsham tsìng-tóng ê tāi-piáu
鬥陣來討論
tàu-tīn lâi thó-lūn
而且朝野的立委嘛有真濟人贊成
jî-tshiánn tiâu-iá ê li̍p-uí mā ū tsin-tsē lâng tsàn-sîng
修法討回補助款
siu-huat thó-huê póo-tsōo-khuánn
*翁金珠 民進黨團書記長
你等到無罪定讞了後
Lí tán kàu bô-tsuē tīng-hiàn liáu-āu
才閣來補發
tsiah-koh lâi póo huat
毋過有的是到最後
m̄-koh ū ê sī kàu tsuè-āu
補發了後才知
póo huat liáu-āu tsiah tsai
我感覺咱應該修法共伊追轉來
guá kám-kak lán ing-kai siu-huat kā i tui--tńg-lâi
*賴士葆 國民黨籍立委
過去就有發生過
Kuè-khì tō ū huat-sing--kuè
伊因為啥物原因就予人判當選無效
i in-uī siánn-mih guân-in tō hōo lâng phuànn tòng-suán bô-hāu
毋過伊重新登記閣當選
m̄-koh i tîng-sin ting-kì koh tòng-suán
然後閣補助一擺
jiân-āu koh póo-tsōo tsi̍t pái
按呢的情形
án-ne ê tsîng-hîng
我感覺社會接受度是較低的
guá kám-kak siā-huē tsiap-siū-tōo sī khah kē--ê
嘛有立委主張修法的方向
Mā ū li̍p-uí tsú-tiunn siu-huat ê hong-hiòng
應該分清楚引起當選無效的原因
ing-kai hun tshing-tshó ín-khí tòng-suán bô-hāu ê guân-in
愛明確規定牽涉著不法
ài bîng-khak kui-tīng khan-sia̍p tio̍h put-huat
親像是買票 用暴力
tshin-tshiūnn sī bé-phiò, īng po̍k-li̍k
抑是詐欺一寡原因
iah-sī tsà-khi tsi̍t-kuá guân-in
就應該討回補助款
tō ing-kai thó-huê póo-tsōo-khuánn
若無 提人民的稅金來付數
nā-bô, the̍h jîn-bîn ê suè-kim lâi hù-siàu
人民恐驚嘛袂當接受
jîn-bîn khióng-kiann mā bē-tàng tsiap-siū
沒有留言:
張貼留言