【技藝101】做。麥芽膏

爐灶古法發酵 父子製作天然麥芽膏

最近來食品安全問題一直發生，現代食物為了銷售都摻了太多添加物。現在有人為了想要找回孩子時，乾淨自然的味，在山上蓋傳統大灶，遵照古法發酵、燒柴，用天然原料做麥芽膏，要讓大家重新認識這好吃的古早味。

這款時代猶有通買著這款物件，伊歡喜我嘛綴咧歡喜
Tsit-khuán sî-tāi iáu ū thang bé-tio̍h tsit-khuán mi̍h-kiānn, i huann-hí guá mā tuè leh huann-hí.

伊這甜袂講足甜，就是小可仔按呢
I tse tinn bē kóng tsiok tinn, tō sī sió-khuá-á án-ne.

熱天著愛保持20度至22度，無真緊就爛--去。
Jua̍h-thinn tio̍h-ài pó-tshî jī-tsa̍p tōo tsì jī-jī tōo, bô tsin kín tō nuā--khì.

咧吹冷氣ê麥仔草，hông照顧甲袂輸是紅嬰仔咧，這是做麥芽膏蓋重要ê原料，隱遁佇石碇仔山內ê王正常，因為思念囡仔時代ê口味，自按呢佇舊厝起灶做麥芽膏
Teh tshue líng-khì ê be̍h-á-tsháu, hông tsiàu-kòo kah bē-su sī âng-enn-á--leh, tse sī tsò be̍h-gê-ko kài tiōng-iàu ê guân-liāu, ún-tūn tī Tsio̍h-tīng-á suann-lāi ê Ông Tsìng-siông, in-uī su-liām gín-á sî-tāi ê kháu-bī, tsū-án-ne tī kū-tshù khí tsáu tsò be̍h-gê-ko.

這个麥芽膏，你著愛人古早有咧收歹銅舊錫，伊若來，啊才有通好換著，佇我ê印象內底，這麥芽膏是有影足罕得有ê物件
Tsit-ê be̍h-gê-ko, lí tio̍h-ài lâng kóo-tsá ū leh siu pháinn-tâng kū-siah, i nā lâi, ah tsiah ū thang hó uānn--tio̍h, tī guá ê ìn-siōng lāi-té, tse be̍h-gê-ko sī ū-iánn tsiok hán-tit ū ê mi̍h-kiānn.

凡勢是一款補償ê心情，退休了後ê王正常，佮厝邊ê老阿媽學做麥芽膏，照古法燃柴來炕，毋過那試那學無輕可，予伊啉誠濟苦湯
Huān-sè sī tsi̍t khuán póo-siông ê sim-tsîng, thè-hiu liáu-āu ê Ông Tsìng-siông, kap tshù-pinn ê lāu-a-má o̍h tsò be̍h-gê-ko, tsiàu kóo-huat hiânn tshâ lâi khòng, m̄-koh ná tshì ná o̍h bô khin-khó, hōo i lim tsiânn tsē khóo-thng.

註：啉苦湯：華語『吃苦頭』。

麥仔草佮秫米咧發酵，啊咱彼陣聽講--honnh，a̍h袂使傷燒a̍h袂使傷冷，啊傷冷頂頭彼層就會臭酸--去，啊若傷過燒，起--來，內底ê菌會刣--死
Be̍h-á-tsháu kap tsu̍t-bí teh huat-kànn, ah lán hit-tsūn thiann kóng--honnh, a̍h bē-sái siunn sio a̍h bē-sái siunn líng, ah siunn líng tîng-thâu hit-iân tō ē tshàu-sng--khì, ah nā siunn-kuè sio, khí--lâi, lāi-té ê khún ē thâi--sí.

步驟

這灶，這柴，看天公伯--à，伊若按呢風吹毋著向，吹北風，西風，來你就慘--ah，哭規工
Tse tsàu, tse tshâ, khuànn Thinn-kong-peh--à, i nā án-ne hong tshue m̄-tio̍h hiòng, tshue pak-hong, sai-hong, lâi lí tō tshám--ah, khàu kui-kang.

成品

張騰聰
佮外口一般--honnh，食--起-來ê口味攏完全佮彼無仝，這現做--ê，物件較新鮮
Kap guā-kháu it-puann--honnh, tsia̍h--khí-lâi ê kháu-bī lóng uân-tsuân kap he bô-kâng, tse hiān-tsò--ê, mi̍h-kiānn khah sin-sian.

劉晏廷
少年人猶原會佮意這號較天然ê物件，袂去愛彼款化學香精足重彼種
Siàu-liân-lâng iû-guân ē kah-ì tsit-hō khah thian-jiân ê mi̍h-kiānn, bē khì ài hit-khuán huà-ha̍k hiang-tsing tsiok tāng hit-tsióng.

人客來直直講，拜託--咧，你一定著愛傳--落-去，恁囝愛傳--落，這是咱ê傳承--喔，毋通閣予拍無--去
Lâng-kheh lâi ti̍t-ti̍t kóng, pài-thok--leh, lí it-tīng tio̍h-ài thuân--lo̍h-khì, lín kiánn ài thuân--lo̍h, tse sī lán ê thuân-sîng--oo, m̄-thang koh hōo phah bô--khì.

原本囡仔佇外口放蕩，嘛因為麥芽膏予爸仔囝ê關係閣重建立，這馬兩个人分工合作，攏是為著使命感，欲將這个古早ê手藝傳承--落-去
Guân-pún gín-á tī guā-kháu hòng-tōng, mā in-uī be̍h-gê-ko hōo pē-á-kiánn ê kuan-hē koh tîng kiàn-li̍p. Tsit-má nn̄g ê lâng hun-kang ha̍p-tsok, lóng sī uī-tio̍h sú-bīng-kám, beh tsiong tsit-ê kóo-tsá ê tshiú-gē thuân-sîng--lo̍h-khì.

細本生理，毋過tsín講變成一个使命，092557袂使聽人講，著愛改gá-suh--啦改用水煙--ê，絕對莫，你一定愛保持這个傳統
Sè-pún sing-lí, m̄-koh tsín kóng piàn-sîng tsi̍t ê sú-bīng. Bē-sái thiann lâng kóng, tio̍h-ài kái gá-suh--lah, kái iōng tsuí-ian--ê, tsua̍t-tuì mài, lí it-tīng ài pó-tshî tsit-ê thuân-thóng.

天然健康ê麥芽膏有人相報喙，交關ê人愈來愈多，王正常講伊總算體會著家己ê名ê意思，原來這才是伊欲愛ê「正常」生活。
Thian-jiân kiān-khong ê be̍h-gê-ko ū lâng sio-pò-tshuì, kau-kuan ê lâng jú lâi jú tsē, Ông Tsìng-siông kóng i tsóng-sǹg thé-huē-tio̍h ka-kī ê miâ ê ì-sù, guân-lâi tse tsiah sī i beh ài ê ‘tsìng-siông’ sing-ua̍h.

記者 余榮宗 新北市報導
kì-tsiá Î Îng-tsong Sin-pak-tshī pò-tō