【技藝101】做。籠床

高雄有一條竹器街，不管是柴桶，或是籠床，市民哪有需要，都會找到這遮，這裡有一個師傅經驗真特別，伊是台灣出世，因為跟後叔去中國大陸，兩岸分開了後長期留在中國，解嚴後回到台灣，伊ma將傳統福州做籠床技術帶回來，現在孫子也傳承了這項技術，公孫倆做伙，為這項傳統工藝努力打拼，得到真濟顧客歡迎，食頭攏做袂離。

做 籠床（Tsò lâng-sn̂g）

鐵仔的honnh，炊起來袂收水。
Thih-á--ê honnh, tshue--khí-lâi bē siu-tsuí.
無放假的喔，一年365工逐天攏愛做。
Bô pàng-ká--ê őo, tsi̍t-nî sann-pah la̍k-tsa̍p-gōo kang ta̍k-kang lóng ài tsò.

佇高雄的竹器街，有一位籠床師傅的經歷真特別，七歲綴福州後叔到中國，後--來國共內戰，不得已留佇當地，就開始做籠床的日子，一直到五十年後，才轉來故鄉。
Tī Ko-hiông ê tik-khì ke, ū tsi̍t-ūi lâng-sn̂g sai-hū ê king-li̍k tsin tik-pia̍t, tshit-huè tuè Hok-tsiu āu-tsik kàu Tiong-kok, āu--lâi Kok Kiōng lāi-tsiàn, put-tik-í lâu tī tong-tē, tō khai-sí tsò lâng-sn̂g ê ji̍t-tsí, it-ti̍t kàu gōo-tsa̍p nî āu, tsiah tńg-lâi kòo-hiong.

去大陸12歲 我就開始綴這个後爸仔 去做籠床啦。
Khì Tāi-lio̍k tsa̍p-jī huè guá tō khai-sí tuè tsit-ê āu-pē-á khì tsò lâng-sn̂g--lah.

我本身台灣人，我毋是大陸人，啊想故鄉啊，愛閣轉來啊。
Guá pún-sin Tâi-uân-lâng, guá m̄-sī Tāi-lio̍k-lâng, ah siūnn kòo-hiong--ā, ài koh tńg--lâi-ā.

回鄉了後的黃先化，仝款做籠床過生活，伊遵守福州技術，工序複雜毋過絕對無偷工減料，伊講，按呢炊出來的物件，才會當來保留原始的氣味。
Huê-hiong liáu-āu ê N̂g Sian-huà, kâng-khuán tsò lâng-sn̂g kuè-sing-ua̍h, i tsun-siú Hok-tsiu ki-su̍t, kang-sū ho̍k-tsa̍p m̄-koh tsua̍t-tuì bô thau-kang kiám-liāu, i kóng, án-ne tshue--tshut-lâi ê mi̍h-kiānn, tsiah ē-tàng lâi pó-liû guân-sí ê khì-bī.

步驟

若用這孟宗竹做就好，較耐高溫啊，較袂爛。
Nā īng tse Bīng-tsong-tik tsò tō hó, khah nāi ko-un--ā, khah bē nuā.

成品

侯阿忠
伊做的籠床足堅固，伊袂因為小可挵著，抑是炊一站仔就會離離落落，籠床嘛是看師傅。
I tsò ê lâng-sn̂g tsiok kian-kòo, i bē in-uī sió-khuá lòng--tio̍h, iah-sī tshue--tsi̍t-tsām-á tō ē li-li-lak-lak, lâng-sn̂g mā-sī khuànn sai-hū.

黃先化的籠床得著肯定，訂單嘛愈來愈濟，佇台北食頭路的孫仔就轉來鬥跤手，毋過過程中猶是會有淡薄仔袂拄好。
N̂g Sian-huà ê lâng-sn̂g tit-tio̍h khíng-tīng, tiānn-tuann mā jú-lâi-jú tsē, tī Tâi-pak tsia̍h-thâu-lōo ê sun-á tō tńg-lâi tàu-kha-tshiú, m̄-koh kuè-tîng tiong iáu-sī ē ū tām-po̍h-á bē tú-hó.

黃重慶
我tsit-má有改過矣，伊拄仔開始一直袂接受啦。
Guá tsit-má ū kái--kuè-ah, i tú-á khai-sí it-ti̍t bē tsiap-siū--lah.

伊會嫌講按呢做袂使，嫌東嫌西，我講哪有袂使，我做的籠床嘛無賣比你較差啊。
I ē hiâm kóng án-ne tsò bē-sái, hiâm-tang-hiâm-sai, guá kóng ná-ū bē-sái, guá tsò ê lâng-sn̂g mā bô bē pí lí khah tsha--ā.

黃先化
伊也有孝啦。伊定定共逐家講阮阿公老人，較袂做啦，啊我來替伊做。
I ā iú-hàu--lah. I tiānn-tiānn kā ta̍k-ke kóng guan a-kong lāu-lâng, khah bē tsò--lah, ah guá lâi thè i tsò.

阿公負責剖竹仔、編織，孫仔專注佇組合，公孫仔沓沓仔揣出適應的方式，面對現代產品的競爭，in兩人相信，只要用心，竹仔籠床永遠袂消失
A-kong hū-tsik phuà tik-á, pian-tsit, sun-á tsuan-tsù tī tsoo-ha̍p, kong-sun-á ta̍uh-ta̍uh-á tshuē-tshut sik-ìng ê hong-sik, bīn-tuì hiān-tāi sán-phín ê kīng-tsing, in nn̄g lâng siong-sìn, tsí-iàu iōng-sim, kang-hu hó, tik-á lâng-sn̂g íng-uán bē siau-sit.

黃先化
攏嘛愛這種的，天然的物件做起來的
Lóng mā ài tsit-tsióng--ê, thian-jiân ê mi̍h-kiānn tsò--khí-lâi-ê.

我佇遮做遮久，攏做袂離。
Guá tī tsia tsò tsiah kú, lóng tsò bē-lī.

黃重慶
有這「一步取」honnh，阿公無愛做，我就共接手落來做，就是講後擺欲食啥穿啥攏免煩惱就著矣。
Ū tse tsi̍t-pōo-tshú honnh, a-kong bô-ài tsò, guá tō kā tsiap-tshiú lo̍h-lâi tsò, tō-sī kóng āu-pái beh tsia̍h siánn tshīng siánn lóng bián huân-ló tō tio̍h--ah.

余榮宗 高雄報導