【技藝101】做。旗袍

裁製旗袍半世紀 大師傅巧藝精工

最近可以發現很多新娘子在婚禮上是穿著復古的旗袍，為了能夠展現出最美的一面，旗袍製做的功夫可就相當重要，老師傅許榮一，和師弟許義熇製作旗袍超過50年，可說是比女人還瞭解自己身段，要如何縫製出一件看起來婀娜多姿，迷人身形的旗袍呢？(2012-09-10-公視中晝新聞)

編輯 / 余榮宗、黃能揚、李江却台語文教基金會 陳豐惠 劉承賢


Kā東方女子ê古典、雅氣、美麗佮溫柔ê氣質展現--出-來。
Kā tang-hong lú-tsú ê kóo-tián, ngá-khì, bí-lē kap un-jiû ê khì-tsit tián-hiān--tshut-lâi.

Os
佇雲林ê作穡人家出世，許榮一是厝內ê大囝，伊十八歲上北學手藝，捌修理電器，發覺講無合興趣了後，會走來做旗袍，實在毋是伊按算在內--ê。
Tī Hûn-lîm ê tsoh-sit jîn-ke tshut-sì, Khóo Îng-it sī tshù-lāi ê tuā-kiánn, i tsa̍p-peh huè tsiūnn-pak o̍h tshiú-gē, bat siu-lí tiān-khì, huat-kak kóng bô ha̍h hìng-tshù liáu-āu, ē tsáu lâi tsò kî-phàu, si̍t-tsāi m̄-sī i àn-sǹg tsāi lāi--ê。

阮媽媽寫批寄來講，啊若是揣無頭路--honnh，轉來厝裡就欲koh割稻仔--ah按呢，我kā阮親情講，凊彩--啦，凊彩仔揣--一-項-仔就好--啦，啊結果，伊就kā我揣來做旗袍。
Gún mah-mah siá phue kià--lâi kóng, ah nā-sī tshuē bô thâu-lōo--honnh, tńg--lâi tshù--lí tō beh koh kuah tiū-á--ah án-ne, guá kā gún tshin-tsiânn kóng, tshìn-tshái--lah, tshìn-tshái-á tshuē--tsi̍t-hāng-á tō hó--lah, ah kiat-kó, i tō kā guá tshuē lâi tsò kî-phàu。

Os
斯當時有明星佮官夫人ê帶動，穿旗袍足時行，許榮一綴上海師傅學做師仔，拄仔好赴著這个好景。
Su-tong-sî ū bîng-tshinn kap kuann-hu-jîn ê tài-tōng, tshīng kî-phàu tsiok sî-kiânn. Khóo Îng-it tuè Siōng-hái sai-hū o̍h tsò sai-á, tú-á-hó hù-tio̍h tsit-ê hó-kíng。


民國差不多四十年甲六十年這段時間，是上蓋輝煌、光輝燦爛ê時期。
Bîn-kok tsha-put-to sì-tsa̍p nî kah la̍k-tsa̍p nî tsit tuānn sî-kan, sī siōng-kài hui-hông, kong-hui tshàn-lān ê sî-kî。


In專門穿長衫ê人--honnh，每一工in就是.....旗袍就是當做咱普通衫咧穿--ah。
In tsuan-mn̂g tshīng tn̂g-sann ê lâng--honnh, muí-tsi̍t-kang in tō sī.....kî-phàu tō sī tòng-tsò lán phóo-thong sann teh tshīng--ah。

步驟

每一个細節攏重要，最主要，人客穿--起-來，就是愛會挺閣會平，形體閣會媠。
Muí-tsi̍t-ê sè-tsiat lóng tiōng-iàu, tsuè-tsú-iàu, lâng-kheh tshīng--khí-lâi, tō sī ài ē thîng koh ē pîng, hîng-thé koh ē suí.

作品

Os
旗袍穿--起-來感覺誠幼秀koh合軀，kā東方女性枝骨ê媠規个展現--出-來，無論大箍瘦，只要有師傅細膩撙節，來做衫ê人，就攏有才調kā家己上媠ê體態來表現。
Kî-phàu tshīng--khí-lâi kám-kak tsiânn iù-siù koh ha̍h-su, kā tang-hong lú-sìng ki-kut ê suí kui-ê tián-hiān--tshut-lâi, bô-lūn tuā-khoo-sán, tsí-iàu ū sai-hū sè-jī tsún-tsat, lâi tsò sann ê lâng, tō lóng ū tsâi-tiāu kā ka-kī siōng suí ê thé-thài lâi piáu-hiān.

註：
枝骨：體態

ns量旗袍

就感覺許師傅真厲害啊，伊就踮我身軀頂縛一條索仔，了後量東量西，量不止仔久，就想講哪會量甲tsiah久，結果試穿了後--啊，就感覺蓋合軀，有影真厲害。
To kám-kak Khóo sai-hū tsin lī-hāi--ah, i to tiàm guá sin-khu-tíng pa̍k tsi̍t tiâu soh-á, liáu-āu niû tang niû sai, niû put-tsí-á kú, tō siūnn-kóng ná ē niû kah tsiah kú, kiat-kó tshì tshīng liáu-āu--ah, tō kám-kak kài ha̍h-su, ū-iánn tsin lī-hāi.


Os
一流水ê功夫名聲透去甲海外，有專工來揣伊做衫ê僑胞，試穿了後不止仔滿意，自按呢講欲去美國kā宣傳，許榮一煞應講

It-liû-suí ê kang-hu miâ-siann thàu khì kah hái-guā, ū tsuan-kang lâi tshuē i tsò sann ê kiâu-pau, tshì tshīng liáu-āu put-tsí-á buán-ì, tsū-án-ne kóng beh khì Bí-kok kā suan-thuân, Khóo Îng-it suah ìng kóng:

註：
一流水（it-liû-suí）：一等一

Ns
若有人問你講佇佗位做--ê，你就講he師傅退休--ah…。
Nā ū lâng mn̄g lí kóng tó-uī tsò--ê, lí tō kóng he sai-hū thè-hiu--ah...


你無想欲趁錢--喔？是按怎？
Lí bô siūnn-beh thàn-tsînn--ooh? Sī-án-tsuánn?


干焦阮兩个人咧做做袂去。啊我這款人--honnh，較貓毛，hennh，做煞--起-來--honnh，你無我看甲滿意--honnh......所以講我這款衫我交袂出--去。
Kan-tann gún nn̄g ê lâng teh tsò tsò bē khì. Ah guá tsit-khuán lâng--honnh, khah niau-moo, hennh, tsò suah--khí-lâi--honnh, lí bô guá khuànn kah buán-ì--honnh.....sóo-í kóng guá tsit-khuán sann guá kau bē tshut--khì.


Os「旗袍」行過時代ê變化，雖然捌落坐，毋過透過老師傅縫紩ê手路，傳承ê連結koh予抾倚--來，透過藝師ê心血，加入流行ê元素，傳統嘛有法度koh展光景
“Kî-phàu” kiânn kuè sî-tāi ê piàn-huà, sui-jiân bat lo̍h-tshē, m̄-koh thàu-kuè lāu-sai-hū pâng-thīnn ê tshiú-lōo, thuân-sîng ê liân-kiat koh hōo khioh uá--lâi, thàu-kuè gē-su ê sim-hiat, ka-ji̍p liû-hîng ê guân-sòo, thuân-thóng mā ū huat-tōo koh tián kong-kíng.

(記者 余榮宗 台北市報導-Kì-tsiá Î Îng-tsong Tâi-pak-tshī pò-tō)