【技藝101】皮影戲

搶救皮影戲藝術 永興樂團員卯足全力

透過光影，搭配對白及樂器來表演的皮影戲，從廣東潮州傳到台灣，也有數百年的歷史，常見於南部的迎神賽會上，皮影戲也從興盛時期的一百多團到現在只剩五團還在運作，其中傳承五代的永興樂為了維持演出，團員們還要兼作其他工作，才能讓這個傳統藝術繼續維持，來看他們的故事。

電視拄仔出來的時陣，這个皮仔戲就自按呢一直落坐。
Tiān-sī tú-á tshut--lâi ê sî-tsūn, tsit-ê phuê-á-hì tō tsū án-ne it-ti̍t lo̍h-tshē.

這馬就足大的危機啊，這馬觀眾族群一直咧流失矣。
Tsit-má tō tsiok tuā ê guî-ki ah, tsit-má kuan-tsiòng tso̍k-kûn it-ti̍t leh liû-sit--ah.

來到工作室，褫開牛皮，張英嬌為著校園的演出，準備製作新的皮猴戲尪仔，為著佇舞台頂有上完美的演出，伊對尪仔製作的細節，要求真懸。
Lâi-kàu kang-tsok-sik, thí-khui gû-phuê, Tiunn Ing-kiau uī-tio̍h hāu-hn̂g ê ián-tshut, tsún-pī tsè-tsok sin ê phuê-kâu-hì ang-á, uī-tio̍h tī bú-tâi tíng ū siōng uân-bí ê ián-tshut, i tuì ang-á tsè-tsok ê sè-tsiat, iau-kiû tsin kuân.

團長 張英嬌
阮皮仔戲的面線足重要，是因為伊是雕花刻透的，欲表現出這身尪仔有清秀無，有緣投無，有媠無，一定愛伊的線條愛足媠。
Guán phuê-á-hì ê bīn-suànn tsiok tiōng-iàu, sī in-uī i sī tiau-hue khik-thàu--ê, beh piáu-hiān tshut tsit sian ang-á ū tshing-siù--bô, ū iân-tâu--bô, ū suí--bô, it-tīng ài i ê suànn-tiâu ài tsiok suí.

佇中國流傳千年的傳統戲劇，來到台灣了後也沓沓仔發展出在地特色，目前全台五个皮猴劇團攏佇高雄市內，其中的永興樂，就是傳承五代的老劇團。
Tī Tiong-kok liû-thuân tshing-nî ê thuân-thóng hì-kio̍k, lâi-kàu Tâi-uân liáu-āu iā ta̍uh-ta̍uh-á huat-tián tshut tsāi-tē ti̍k-sik, bo̍k-tsiân tsuân Tâi gōo-ê phuê-kâu kio̍k-thuân lóng tī Ko-hiông-tshī lāi, kî-tiong ê Íng-hing-lo̍k, tō-sī thuân-sîng gōo tāi ê lāu kio̍k-thuân.

大哥 張新國
皮仔戲伊原底是人佇咧娶某咧拜天公，抑是講人還願。
Phue-á-hì i guân-tē sī lâng tī-leh tshuā-bóo leh pài thinn-kong, iah-sī kóng lâng hîng-guān.

步驟

因為皮猴戲落坐矣，所以阮行入校園，希望透過推廣的跤步，介紹這个傳統文化予逐家認捌。
In-uī phuê-kâu-hì lo̍h-tshē--ah, sóo-í guánkiânn-ji̍p hāu-hn̂g, hi-bāng thàu-kuè thui-kóng ê kha-pōo, kài-siāu tsit-ê thuân-thóng bûn-huà hōo ta̍k-ke jīn-bat.

開場ns
校長 蕭木川
予咱的囡仔會當了解台灣傳統物件的媠，足無希望咱這个遮好的傳統戲劇會佇台灣失傳去。
Hōo lán ê gín-á ē-tàng liáu-kái Tâi-uân thuân-thóng mi̍h-kiānn ê suí, tsiok bô hi-bāng tsit-ê tsiah-hó ê thuân-thóng hì-kio̍k ē tī Tâi-uân sit-thuân--khì.

團長 張英嬌
對上基礎的學生來培養的時陣，有一工伊若佮意皮仔戲，就算講永興樂無存在矣，毋過有這一粒種子，伊家己會去創團啊。
Tuì Siōng ki-tshóo ê ha̍k-sing lâi puê-ióng ê sî-tsūn, ū tsi̍t-kang i nā kah-ì phuê-á-hì, tō sǹg kóng Íng-hing-lo̍k bô tsûn-tsāi--ah, m̄-koh ū tsit tsi̍t-lia̍p tsíng-tsí, i ka-kī ē khì tshòng thuân ah.

為著掖種，永興樂的演出方式有小可改變，以倚近現代的語言，予囡仔會通融入劇情，看著囡仔滿面歡喜的表情，張--家兄妹仔相信，種子總有開花結子的一工。
Uī-tio̍h iā-tsíng, Íng-hing-lo̍k ê ián-tshut hong-sik ū sió-khuá kái-piàn, í uá-kīn hiān-tāi ê gí-giân, hōo gín-á ē-thang iông-ji̍p kio̍k-tsîng, khuànn-tio̍h gín-á muá-bīn huann-hí ê piáu-tsîng, Tiunn--ka hiann-muē-á siong-sìn, tsíng-tsí tsóng ū khui-hue kiat-tsí ê tsi̍t-kang.

大哥 張新國
皮仔戲是誠媠的物件啦，你若欲共擲掉宛那足無彩啦，古早老歲仔都有這个底，誰嘛無願意講到我這代就共放掉。
Phuê-á-hì sī tsiânn suí ê mi̍h-kiānn--lah, lí nā beh kā tàn-tiāu uan-ná tsiok bô-tshái--lah, kóo-tsá lāu-huè-á to ū tsit-ê té, siáng mā bô guān-ì kóng kàu guá tsit-tāi tō kā pàng-tiāu.

布幕頭前的戲尪仔，當咧講一个閣一个精彩的傳奇故事，佇光影流動之間，現出皮猴戲的吸引力，布幕後壁的藝師，也為著延續傳統，拍拚寫出屬佇家己的光彩。
Pòo-bōo thâu-tsîng ê hì-ang-á, tng-leh kóng tsi̍t-ê koh tsi̍t-ê tsing-tshái ê thuân-kî kòo-sū, tī kng iánn liû-tōng tsi-kan, hiàn-tshut phuê-kâu-hì ê khip-ín-la̍t, pòo-bōo āu-piah ê gē-sai, iā uī-tio̍h iân-sio̍k thuân-thóng, phah-piànn siá-tshut sio̍k-tī ka-kī ê kong-tshái.

余榮宗 高雄報導