精益求精！ 百年錫器老店追求極致
印象中的百年老店應該都是遵照傳統在運作，尤其是宗教藝品，不過在鹿港有一家百年錫器老店，除了保留舊有的精神外，老闆更使用精密工具丈量，就是希望在精準度上追求到極致，也是這樣的精神，讓全家人跟著投入這個領域，讓他能在空閒之餘，走進社區從事工藝教學，推廣錫器這項老傳統。
錫器佇鹿港遮本底就已經是較傳統的物件。
Siah-khì tī Lo̍k-káng tsia pún-té tō í-king sī khah thuân-thóng ê mi̍h-kiānn.
我就是欲突破我家己，你欲進步就是按怎，就是愛揣內底挑戰。
Guá tō-sī beh tu̍t-phuà guá ka-kī, lí beh tsìn-pōo tō-sī án-tsuánn, tō-sī ài tshē lāi-té thiau-tsiàn.
鹿港是宗教真興的地區，拜拜用的錫器嘛對遮生出來，根據《鹿港鎮志》記載，上興的時，全鎮的錫店有百外間，做錫的手藝嘛佇遮誠有發展。
Lo̍k-káng sī tsong-kàu tsin hing ê tē-khu, pài-pài īng ê siah-khì mā tuì tsia senn--tshut-lâi, kin-kù《Lo̍k-káng Tìn-tsì》kì-tsài, siōng hing ê sî, tsuân tìn ê siah-tiàm ū pah-guā king, tsò siah ê tshiú-gē mā tī tsia tsiânn ū huat-tián.
李漢卿
咱咧用的一寡器具，有伊的含意，在伊的含意內底是有分大廟、神明壇、人家，所以講伊樣式有大有中有小。
Lán leh īng ê tsi̍t-kuá khì-khū, ū i ê hâm-ì, tsāi i ê hâm-ì lāi-té sī ū hun tuā-biō, sîn-bîng-tuânn, jîn-ke, sóo-í kóng i iūnn-sik ū tuā ū tiong ū sió.
傳承一百年的老錫店，見若柑棚、案桌等等拜拜用的家私，攏是店內的大色貨，但是李漢卿發現傳統錫藝並無講究精準度，伊盡力研究，甚至用精密的工具，就是欲追求完美。
Thuân-sîng tsi̍t-pah nî ê lāu siah-tiàm, kìnn-nā kam-pênn, àn-toh tíng-tíng pài-pài īng ê ke-si, lóng-sī tiàm lāi ê tuā-sik-huè, tān-sī Lí Hàn-khing huat-hiān thuân-thóng siah-gē pīng-bô káng-kiù tsing-tsún-tōo, I tsīn-la̍t gián-kiú, sīm-tsì īng tsing-bi̍t ê kang-khū, tō-sī beh tui-kiû uân-bí.
李漢卿
你袂當kā改變，但是你有法度kā改變的是內底的工法參伊的幼膩度，遮的你若做會媠，鋩鋩角角做會出來，這物件就變較精品
Lí buē-tàng kā kái-piàn, tān-sī lí ū-huat-tōo kā kái-piàn--ê sī lāi-té ê kang-huat tsham i ê iù-jī-tōo, tsia--ê lí nā tsò ē suí, mî-mî-kak-kak tsò ē tshut-lâi, tse mi̍h-kiānn tō piàn khah tsing-phín.
李漢卿
有的問講你出師未，我做到tsit-má我感覺家己猶未出師，猶閣足han-bān的，猶有足濟愛去追求完美的。
Ū ê mn̄g kóng lí tshut-sai--bē, guá tsò kàu tsit-má guá kám-kak ka-kī iáu-bē tshut-sai, iáu-koh tsiok han-bān--ê, iáu-ū tsiok tsuē ài khì tui-kiû uân-bí--ê.
學員
佮想像的無啥仝，原本掠準伊kan-ta是傳統的祭祀彼方面的。
Kap sióng-siōng--ê bô siánn kâng, guan-pún lia̍h-tsún i kan-ta sī thuân-thóng ê tsè-sū hit hong-bīn--ê.
學員
老師等於是攏無保留咧kā阮教，我感覺學習這个物件足好的。
Lāu-su tíng-û sī lóng-bô pó-liû leh kā gún kà, guá kám-kak ha̍k-si̍p tsit-ê mi̍h-kiānn tsiok hó--ê.
李漢卿
將這項in較生疏的錫，傳授予in，日後的時，有法度來學的人會閣較濟。
Tsiong tsit-hāng in khah tshenn-soo ê siah, thuân-siū hōo--in, ji̍t-hiō ê sî, ū-huat-tōo lâi ha̍k-si̍p ê lâng ē koh-khah tsuē.
雖然無閒，李漢卿閣會去社大教學，傳授拍錫的手藝；伊會當安心出外推廣，是因為厝內第五代已經會當扞盤。
Sui-jiân bô-îng, Lí Hàn-khing koh ē khì siā-tāi kàu-ha̍k, thuân-siū phah-siah ê tshiú-gē, i ē-tàng an-sim tshut-guā tshui-kóng, sī in-uī tshù-lāi tē-gōo tāi í-king ē-tàng huānn-puânn.
第五代李政豪
因為這種物件tsit-má愈來愈少人會曉，所以講咱嘛是愛傳承--lah。
In-uī tsit-tsióng mi̍h-kiānn tsit-má jú-lâi-jú tsió lâng ē-hiáu, sóo-í kóng lán mā-sī ài thuân-sîng--lah.
李漢卿
到今仔日又閣有序細傳授落來囉，傳承以後，我就感覺講，若像（心肝頭）這塊大石攏kā放落去囉。
Kàu kin-á-ji̍t iū-koh ū sī-sè thuân-siū--lo̍h-lâi-lòo, thuân-sîng í-āu, guá tō kám-kak kóng, ná-tshiūnn（sim-kuann-thâu）tsit-tè tuā-tsio̍h lóng kā pàng--lo̍h-khì-lòo.
全家伙的投入，予李漢卿免煩惱其他的代誌，會當浸佇拍錫手藝的世界，精準的工法，予傳統錫器有新的美感，嘛予百年老店活出新的面貌。
Tsuân ke-hué ê tâu-ji̍p, hōo Lí Hàn-khing bián huân-ló kî-tha ê tāi-tsì, ē-tàng tsìm tī phah-siah tshiú-gē ê sè-kài, tsing-tsún ê kang-huat, hōo thuân-thóng siah-khì ū sin ê bí-kám, mā hōo pah-nî lāu-tiàm ua̍h tshut sin ê bīn-māu.
余榮宗 彰化報導
沒有留言:
張貼留言