【技藝101】箍。柴桶

不用鐵釘.無黏劑 老師傅硬底子箍柴桶

大家都知道雲林古坑是台灣咖啡的故鄉，但是，這裡不只咖啡出名，還有一位箍柴桶的老師傅，他堅持用傳統工法作桶仔，不用鐵釘，也不用化學黏劑，實用擱環保。

編輯 / 余榮宗、黃能揚、李江却台語文教基金會 陳豐惠 劉承賢

手工業啊，落坐差不多幾若十冬的neh。
Tshiú-kang-gia̍p--ā, lo̍h-tshē tsha-put-to kuí-nā tsa̍p tang--ê neh.

因為咱這个文化嘛愛留落來啊，無生理來講嘛是照常閣做。
In-uī lán tsit-ê bûn-huà mā-ài lâu--lo̍h-lâi-ā, bô sing-lí lâi kóng mā-sī tsiàu-siông koh tsò.

Os
古坑，台灣咖啡的故鄉，空氣中除了焦芳的氣味，猶有薄薄的松梧芳味。鋸柴、剾柴，柴桶師傅盧海俊，佇庄跤的一角仔，傳承手工松梧柴桶將近六十年--ah。
Kóo-khinn, Tâi-uân ka-pi ê kòo-hiong, khong-khì tiong tû-liáu ta-phang ê khì-bī, iáu-ū po̍h-po̍h ê siông-ngôo phang-bī. Kì tshâ, khau tshâ, tshâ-tháng sai-hū Lôo Hâi-tsùn, tī tsng-kha ê tsi̍t-kak-á, thuân-sîng tshiú-kang siông-ngôo tshâ-tháng tsiong-kīn la̍k-tsa̍p nî--ah.

到我本身是第三代，較早時代完全是攏木桶啦。因為這家家戶戶愛用的物件。
Kàu guá pún-sin sī tē-sann tāi, khah-tsá sî-tāi uân-tsuân sī lóng bo̍k-tháng--lah. In-uī tse ka-ka-hōo-hōo ài iōng ê mi̍h-kiānn.

Os
逐款柴桶用途真濟，是早期一般人定用的生活器具，到甲今仔日，煞漸漸予現代產品取代，毋過盧海俊堅持古法手工製造，修邊、接榫，雖然厚工，毋過會當予人客用甲真健康
Ta̍k khuán tshâ-tháng iōng-tôo tsin tsē, sī tsá-kî it-puann lâng tiānn iōng ê sing-ua̍h khì-kū, kàu kah kin-á-ji̍t, suah tsiām-tsiām hōo hiān-tāi sán-phín tshú-tāi, m̄-koh Lôo Hái-tsùn kian-tshî kóo-huat tshiú-kang tsè-tsō, siu-pinn, tsiap-sún, sui-jiân kāu-kang, m̄-koh ē-tàng hōo lâng-kheh iōng kah tsin kiān-khong.

糊仔你嘛逐家嘛攏知，石化產品，對身體無好啦。
Kôo-á lí mā ta̍k-ke mā lóng tsai, tsio̍h-huà sán-phín, tuì sin-thé bô-hó--lah.

全部做手工，嘛予人用了健康安全。
Tsuán-pòo tsò tshiú-kang, mā hōo lâng iōng liáu kiān-khong an-tsuân.

步驟

角度佮這个趨度，啊形體的變化，嘛是古早照傳落來伊彼个技術算法攏仝款。
Kak-tōo kap tsit-ê tshu-tōo, ah hîng-thé ê piàn-huà, mā-sī kóo-tsá tsiàu thuân--lo̍h-lâi i hit-ê ki-su̍t sǹg-huat lóng kāng-khuán.

成品

騎車咖啡園

古早咱都無愛彼个有毒的藥仔，對咱身體也無好啊。
Kóo-tsá lán to bô-ài hit-ê ū-to̍kê io̍h-á, tuì lán sin-thé iā bô-hó--ā.

做好的桶，予人用了浸了身體健康，種好的咖啡，予人食了精神健康。
Tsò hó ê tháng , hōo lâng iōng liáu tsìm liáu sin-thé kiān-khong, tsìng hó ê ka-pi, hōo lâng tsia̍h liáu tsing-sîn kiān-khong.

Os
盧海俊另外猶有種有機咖啡，無使用農藥參佮土地共存的想法，雖然影響產量，毋過保護環境的使命，予伊培育出來的咖啡就是佮伊做的松梧桶仝款好。
Lôo Hái-tsùn līng-guā iáu-ū tsìng iú-ki ka-pi, bô sú-iōng lông-io̍h tsham kap thóo-tē kiōng-tsûn ê siūnn-huat, sui-jiân íng-hióng sán-liōng, m̄-koh pó-hōo khuân-kíng ê sú-bīng, hōo i puê-io̍k--tshut-lâi ê ka-pi tō-sī kap i tsò ê siông-ngôo tháng kâng-khuán hó.

咱就是堅持閣做無影響，因為咱做親像咱這个年歲做是做健康的，閣再來，文化留落來，honnh，啊下一代欲做，伊嘛會使閣做。
Lán tō-sī kian-tshî koh tsò bô íng-hiáng, in-uī lán tsò tshin-tshiūnn lán tsit-ê nî-huè tsò sī tsò kiān-khong--ê, koh-tsài lâi, bûn-huà lâu--lo̍h-lâi, honnh, ah ē tsi̍t-tāi beh tsò, i mā ē-sái koh tsò.

Os
盧海俊講:「無論咖啡抑是柴桶，攏是這片（phiàn）土地予咱的」，箍桶過程，絕對無浪費每一分柴料，伊懷抱（huâi-phāu）對大地的謙卑，嘛守護傳承三代的柴桶工藝。
Lôo Hái-tsùn kóng：“Bô-lūn ka-pi ia̍h-sī tshâ-tháng, lóng-sī tsit phiàn thóo-tē hōo lán ê.”khoo-tháng kuè-thîng, tsua̍t-tuì bô lōng-huì muí tsi̍t-hun tshâ-liāu, i huâi-phāu tuì tāi-tē ê khiam-pi, mā siú-hōo thuân-sîng sann-tāi ê tshâ-tháng kang-gē.

余榮宗 雲林報導