【技藝101】做。燈籠

在沒有電燈的年代，都是用燈籠，到今仔日，燈籠是特別的日子才會使用，在雲林北港，還有一間手工做燈籠的店，老師傅堅持傳統，不追求市場流行，他說，保持傳統、是要對神明有交待。


編輯 / 李江却台語文教基金會 陳豐惠 劉承賢、余榮宗、黃能揚

「喪喜事攏有用著，抑是地方廟的欲做大醮，彼攏有用鼓仔燈。」
「Song-hí-sū lóng-ú īng－－tio̍h,，iah-sī tē-hng biō－－ê beh tsò tuā tsiò, he lóng-ú īng kóo-á-ting.」

「阮做這種的物件，神明欲用的，最主要是愛對神明有交代。」
「Gún tsò tsit tsióng ê mi̍h-kiānn, sîn-bîng beh iōng－－ê,tsuè tsú-iàu sī ài tuì sîn-bîng ū kau-tài.」

註：
阮：我、我們，Gún，代名詞

北港朝天宮頭前的廟（店），
Pak-káng Tiâu-thian-kiong thâu-tsîng ê biō（tiàm）,
林聰賢翁仔某當咧無閒趕做鼓仔燈，
Lîm Tshong-hiân ang-á-bóo tng-leh bô-îng kuánn tsuè kóo-á-ting,
現此時雲林做鼓仔燈的師傳干焦in猶用手工佇咧做。
hiān-tshú-sî Hûn-lîm tsuè kóo-á-ting ê sai-hū kan-ta in iáu īng tshiú-kang tī-leh tsuè.

註：
翁仔某：夫妻倆，ang-á-bóo，名詞
當咧：正在，tng-leh，副詞
現此時：現在，hiān-tshú-sî，副詞
干焦：只有，kan-ta，副詞
in：他們，羅馬拼音，代名詞
佇咧：在，tī-leh，副詞

「鼓仔燈佇我的祖先到我，我是第五代。」
「Kóo-á-ting tī guá ê tsóo-sian kàu guá, guá sī tē-gōo tāi.」

「媽祖廟是世界有名的,啊從細漢就是按呢拜嘛，所以講對一寡宗教祭典，阮有比較較投入。」
Má-tsóo-biō sī sè-kài ū-miâ－－ê,ah tsîng sè-hàn tō-sī án-ne pài－－mah,sóo-í kóng tuì tsi̍t-kuá tsong-kàu tsè-tián, gún ū pí-kàu khah tâu-ji̍p..」

註：一寡，一些，tsi̍t-kuá，副詞

照傳說從東漢的張天師創立道教了後，
Tsiàu thuân-suat tsîng Tang-hàn ê Tiunn thian-su tshòng-li̍p Tō-kàu liáu-āu,
鼓仔燈就綴咧出現矣，而且款式真濟，
kóo-á-ting tō tuè leh tshut-hiān－－ah, jî-tshiánn khuán-sit tsin tsē,
有宮燈，竹篾仔燈，傘燈，
ū kiong-ting, tik-bi̍h-á-ting, suànn-ting,
好歹代誌攏著愛用著。
hó-pháinn tāi-tsì lóng tio̍h-ài īng－－tio̍h.
猶閣有迎神明鬧熱的時陣，
Iáu-koh ū ngiâ sîn-bîng lāu-jia̍t ê sî-tsūn,
陣頭頭前兩葩大葩的鼓仔燈，
tīn-thâu thâu-tsîng nn̄g pha tuā-pha ê kóo-á-ting,
彼是為著欲共神明炤路。
he sī uī-tio̍h beh kā sîn-bîng tshiō-lōo

註：
綴咧，跟著，tuè leh，動詞
真濟，真多，tsin tsē，形容詞
欲共，要給，beh kā，動詞
炤路，照路，tshiō-lōo，動詞
製燈步驟現場：1打底、2編織、3收尾、4上紙、5彩繪、6上字、7上桐油



複雜的程序，逐步攏袂當凊彩，
Ho̍k-tsa̍p ê thîng-su, ta̍k pōo lóng bē-tàng tshìn-tshái,
綴翁婿破竹仔，做竹篾30冬的牽手丁秋香嘛講，
Tuè ang-sài phuà tik-á, tsuè tik-bi̍h sann-tsa̍p tang ê khan-tshiú Ting Tshiu-hiong mā kóng,
這項工課有影是真艱苦做（艱計；艱計=華語『辛苦』）。
tsit hāng khang-khuè ū-iánn sī tsin kan-khóo tsuè（kan-kè）.

註：
袂當，不能， bē-tàng，副詞
凊彩，隨便， tshìn-tshái，形容詞

「一工落來毋知割幾遍，毋知，因為你頭仔袂曉破的時陣honnh，你一落去有當時仔一下就按手落去矣。這軟略度一定愛拄仔好，拆落honnh這紙貼落才會平。」

「Tsi̍t kang lo̍h－－lâi m̄-tsai kuah kuí piàn, m̄-tsai,in-uī lí thâu－－á bē-hiáu phuà ê sî-tsūn honnh,lí tsi̍t lo̍h－－khì ū-tang-sî-á tsi̍t-ē tō àn tshiú lo̍h－－khì-ah.Tse nńg-lio̍h-tōo it-tīng ài tú-á-hó, thiah－－lo̍h honnh tse tsuá tah－－lo̍h tsiah ē pênn.」

註：拄仔好，剛剛好，tú-á-hó，副詞

老店欲生存，一般攏會考慮愛綴會著時代，
Lāu-tiàm beh sing-tsûn, it-puann lóng ē khó-lū ài tuè-ē-tio̍h sî-tāi,
毋過雖然有人捌倩林聰賢做流行的鼓仔燈，
m̄-koh sui-jiân ū-lâng bat tshiànn Lîm Tshong-hiân tsuè liû-hîng ê kóo-á-ting,
伊煞無愛接這款生理。
i suah bô-ài tsiap tsit khuán sing-lí.

註：
捌，曾經，bat，副詞
煞，卻，suah，副詞
生理，生意，sing-lí，名詞

「叫我做較花血，就是欲和人無仝啊，通常彼我攏推掉啦。無想欲做，袂接啦。個人的觀念就是講宗教就是傳統。」
「Kiò guá tsò khah hue-hiat, tō-sī beh hām lâng bô-kâng－－ā,thong-siông he guá lóng the-tiāu－－la.Bô siūnn-beh tsò, bē tsiap－－la.Kò-jîn ê kuan-liām tō-sī kóng tsong-kàu tō-sī thuân-thóng.」
這款的堅持敢有才調閣繼續延續落去？
Tsit khuán ê kian-tshî kám-ū tsâi-tiāu koh kè-siok iân-sio̍k－－lo̍h-khì？
後一代敢願意接手？
Āu tsi̍t tāi kám guān-ì tsiap-tshiú？

註：

花血，花俏、浮華，hue-hiat，形容詞
有才調，有能力，ū tsâi-tiāu，副詞

「我嘛是希望有人會當來接，啊都沓沓和in溝通看覓咧。我嘛無希望這个物件到我遮自按呢就斷去，因為這種物件是一間無做就減一間。」
「Guá mā-sī hi-bāng ū lâng ē-tàng lâi tsiap.Ah to ta̍uh-ta̍uh hām in koo-thong khuànn-māi－－leh.Guá mā bô hi-bāng tsit-ê mi̍h-kiānn kàu guá tsia tsū án-ne tō tn̄g－－khì.In-uī tsit tsióng mi̍h-kiānn sī tsi̍t king bô tsò tō kiám tsi̍t king.」

註：
會當，能夠，ē-tàng ，副詞
沓沓，逐漸、屢屢、慢慢地，ta̍uh-ta̍uh，副詞
遮，這裡， tsia，名詞

恬靜的下晡時仔，老師傅佮素常時仝款，
Tiām-tsīng ê e-poo sî-á, lāu sai-hū kap sòo-siông-sî kâng-khuán,
咧做鼓仔燈，毋是為著欲趁錢，
leh tsuè kóo-á-ting, m̄-sī uī-tio̍h beh thàn-tsînn,
是干焦希望講這鼓仔燈會當繼續閣吊懸懸。
sī kan-ta hi-bāng kóng tse kóo-á-ting ē-tàng kè-sio̍k koh tiàu kuân-kuân.
註：

素常，平常、平素，sòo-siông，名詞
仝款，一樣、同樣，kâng-khuán，形容詞
趁錢，賺錢，thàn-tsînn，動詞
干焦，只有，kan-ta，副詞
吊懸懸，吊高高，tiàu kuân-kuân，動詞＋副詞